Мала річ – а тішыт. Руска Бурса в Ґуґль Мапс.

Маме приємніст передати веселу вістку, котра може і не така велика, не така шокуюча, але все приємні, коли Лемкы вказуют ся в великым світі. А в тым примірі є то дослівне.

Головна садиба нашого радия, порталю і Стоваришыня є уж в Ґуґль Мапс (maps.google.com). Ґуґль Мапс то найбарже популярна мапа світа, котру хоснує ся не лем в компутерах, але і на смартфонах, таблетах і інчых нарядях. Єдном з функцийональности тых карт є інтеґрация з базом місц, адресів і  ріжного рода придатных ґеоґрафічных підповіди. Жебы вписати гын Бурсу, не старчыло подати нашых даных. Стрыко Ґуґль самы мусіли провірити, ци дахто там фактычні є і выслал нам лист з верифікацийным кодом. А же в Бурсі уж фурт дахто урядує, то скоро сме тото ввели. Най Вас не отуманят поданы там годины отворіня, котры тычат ся лем реґулярні отвореной Біблийотекы. В Бурсі практычні штоден дахто надає, высылат, пише, прібує, вчыт ся, або співат.

Ґуґль Мапс має тіж навіґацийну функцийональніст, зато коли лем впишете в своій мобільці Ruska Bursa w Gorlicach, она зараз Вас гын направит. Без огляду, ци сте піше, ровером, ци мерцедесом. Увага, Стрыко Ґуґль долго памятают кади сте ходили, бо за тым адресом мож провірити тото дост докладні, як лем мате конто на смартфоні.

Хоснуйте і заходте – не лем віртуальні.