„Маґуры’14”

Вказали ся новы „Маґуры” – „Маґуры’14” – то крайознавчий річник, посвячений Низкому Бескідови і Погірю, печатаний Студентскым Кругом Бескідскых Провідників в Варшаві.

В його найновшым номері найдете, як все, вельо цікавых і вартісных дописів, м. ін.:

• Петро Вірхнянскій: Лемківскій Талергоф,
• Боґуслав Ґлуд: Хемічна война під Ґорлицями,
• Вєслав Жызновскі: Ольховец всесвітом Миколая Моряка.

Єст тіж статя бл. п. др Уршулі Яніцкой-Кжывды, авторкы вельолітнього маґурского циклю дописів о бескідскых святых. Остатнім святым, котрого встигла описати для „Маґур”, єст св. Пахомій.

Од парох років в „Маґурах” находит ся тіж місце для справозданя з діяльности за даний рік Стоваришыня Маґурич та перегляд книжок про Низкій Бескід, печатаных в 2014 році.

В найновшым номері „Маґур” поміщено тіж допис Мариі Вірхняньской Ґладышівскы польско‑лемківскы ночы і дни по II світовій війні. Єст то текст, котрий был выріжнений II місцьом на XVII Конкурсі Близка Істория: Полякы і сусіды по другій світовій войні: разом, побік себе, проти собі… орґанізуваного Осередком Карта. Тота історычна праца презентувана была два рокы тому в Рускій Бурсі (о чым писали сме гев).

„Маґуры” – крайознавчий річник, посвячений Низкому Бескідови і Погірю, печатаний Студентскым Кругом Бескідскых Провідників в Варшаві. Перший номер вказал ся в 1972 році з нагоды VIII Райду в Низкым Бескіді. Скорше, од 1965 рока, выдавано інформатор Низкій Бескід, в котрым поміщано крайознавчы моноґрафіі сел на пути райду. Тепер єст то часопис, якій тыкат історычных, ентоґрафічных, часом социйоґрафічных і – очывидні – крайознавых тем. В великій мірі посвячений єст культурі і істориі Лемків та Лемковины.