Маґурич іхат ремонтувати цмонтір в Ґрузиі

Стоваришыня Маґурич, котре од вельох років ремонтує придорожны кресты, капличкы, цмонтері та інчы елементы сепульклярной штукы в полудньовій Польщы (в тым на Лемковині) і в Украіні, рыхтує ся до выізду до Ґрузиі, жебы гын в єй столици выремонтувати і упорядкувати старий ґрузиньско-польскій цмонтір.

Сеса експедиция одбуде ся в днях од 30. серпня т.р. до 23/24. вересня т.р. в Тібілісі на цмонтері Кукя. О тій подіі заявляме, понеже орґанізаторы глядают єдного, або двох волонтерів, котры схотіли бы поіхати зо Стоваришыньом до Ґрузиі і помочы при ремонті спомянутого цмонтеря. Обставины і детальны інформациі, звязаны з запотребуваньом на волонтерів, найдете під тым номерaми: 600-688-811 або 18-351-63-45, та майльом: szymon.modrzejewski@gmail.com, або за тым мотузком на ґамбокнижковым фанпейджы Маґурича.

Стоваришыня Маґурич выремонтувало білше як 1000 памятників на веце як 100 цмонтерях.

На Лемковині было м.ін. в Команчы, Вислоку, Липовци, Бальници, Черемсі, Воли Нижній, Воли Выжній, Дарові, Чыстогорбі, Мощанци, Шклярах, Мшані, Полянах Суровичных, Котани, Крампній, Ожынні, Полянах, Грабі, Жыдівскым, Радоцині, Вышоватці, Тихани, Долгым, Волівци, Бортным, Смереківци ци в Новици. Послідній табір Маґурича мал місце на цмонтері в Панкній, де окрем реставрациі старых занедбаных памятників, привернено іх на місце, де стояли до 80. років ХХ ст.