«Маґура» – другє чысло

Маґурскій Державний Парк в остатніх днях напечатал другій номер нового часопису «Маґура». О його премєровым примірнику писали сме гев.

В найновшым номері можете почытати м.ін. про тото, чым ріжнил буде ся новорыхтуваний природничо-культуровий пут Свіржова Руска од уж істнуючых на обшыри Парку пути: Кычера (веде через околиці Жыдівского), Галбів-Камін (околиці Крампной), Фолюш (околиці того села). Окрем того, дознате ся дакус про туристычну інфраструктуру Маґурского Державного Парку, а тот в цілости находит ся в обшыри Лемковины, зато добрі знати, што оферує і якы маме можливости, кєд іде о того рода формы выпочынку на Лемковині. Єст тіж допис про лукы, орлы і волкы, реляция з Ботанічной Ночы Музеів і опис проєкту Ґміна Крампна – Приязна Ґміна.

Часопис «Маґура» в друкуваній версиі кольпортуваний є безплатні в семох ґмінах, на обшыри котрых находит ся Маґурскій Державний Парк, та в Едукацийным Осередку МДП в Крампній. В електронічній версиі мож побрати го зо сайту парку magurskipn.pl за тым мотузком.