Мадярьско має по списованю менше жытелів, но Русинів є веце

Чісло жытелів Мадярьска ку 1-му октобру 2022-го року было подля списованя жытелів, яке было із 2021-го року перенесене на минувшый рік, 9 603 634. Од 2011-го року популація в Мадярьску знижыла ся о веце як 300 тісяч людей.

Інформовав о тім Централный штатістічный уряд у віторок 26-го септембра 2023-го року. В році 2011 жыло в Мадярьску іщі 9 937 628 жытелів. На неповинный вопрос о народности одповіло 86 процент людей. Русины наперек низшій популації в Мадярьску наросли.

Найвекшов меншынов суть Ромове

Мадярьско має тринадцять офіціално вызнаных народностных меншын. Найвекшов меншынов зістали Ромове, ку котрым приголосило ся 209 909 особ, но значно стратили. В році 2011 ку тій народности голосило ся понад 315 тісяч людей.

Другов найвекшов меншынов є німецька. Ку Німцям приголосило ся 142 551 особ, а так само є їх менше як в попереднім списованю, коли їх было іщі 185 696. Третіма найвекшыма суть Словаци, котрых ся приголосило 29 881, в році 2011 їх было іщі 35 208.

Ку Булгарам приголосило ся 6 109 людей, Ґреків є дакус веце, кедь за переписом з 2022-го року рахують 6 178 особ. Ку хорватьскій народностній меншыні ся голосить 21 824 особ, Поляци наросли, кедьже ся ку тій меншыні приголосило 7 398 людей, причім в році 2011 то было 7 001 особ.

Армянів є в Мадярьску за остатнім списованьом 4 199, в попереднім списованю їх было 3 571. Румунів є 27 554, но погіршыли собі, бо было їх в році 2011 іщі 35 641, Сербів ся приголосило 11 662, а так само наросли в поріваню з попереднім цензом, коли їх было 10 038.

Наросли і Словены, котрых є ку октобру 2022-го року 3 965, а в році 2011 їх было 2 820. Радікално наросла україньска меншына, котра раховала в році 2011 лем 7 396 людей, а теперь ся ку ній приголосило 24 615 особ.

Русины знова росли

Русиньска народностна меншына в Мадярьску так само може похвалити ся успішныма резултатами, а то як в чіслі особ, котры приголосили ся ку народности, так і в чіслі тых, котры записали собі русиньскый язык як материньскый.

Ку Русинам приголосило ся у 2022-ім році 7 111 людей, в році 2011 то было лем 3 882 особ. Покля в попереднім списованю собі материньскый язык русиньскый записало 999 особ, теперь є то уж 1 981 людей.

Списованя в Мадярьску мало і вопрос на язык, котрый хоснує особа в родині або меджі приятелями. І в тій катеґорії Русины наросли, бо в році 2011 до той катеґорії русиньскый язык записало собі 1 131 особ, а теперь 2 382.

Із тых резултатів видіти, же русиньска комуніта в Мадярьску не выросла лем на міґрації, але же знова веце приголосило ся домашніх Русинів, котры уж не знають язык, але принавертають ся ку свому походжіню, за што треба подяковати актівній роботі русиньскых орґанізацій і самосправовань.

Мадярьско страчать віру

Списованя із 2022-го року вказало, же штораз менше людей в Мадярьску голосить ся ку віроісповіданю, наопак, радікално росне чісло тых, котры не одповіли на тот вопрос.

Ку Римокатолицькій церькви, котра є найвекшов, приголосило ся 2 643 885 людей, в році 2011 то было 3 691 389, а в році 2001 аж 5 289 521 особ. Ґрекокатолицька церьков за остатнім списованьом рахує 165 135 віруючіх, притім в році 2011 їх было понад 179 тісяч, а в році 2001 докінця аж нецілых 269 тісяч.

Православны суть поділены подля приналежности до окремых церьковных юрідікцій. До ґречеськых православных записало ся 3 443 людей і значно наросили, російскых православных є 2 462, сербскых 1710, булгарьскых 475, румуньскых 3 618 і представлюють найвекшу православну комуніту в Мадярьску.

Україньскых православных є 1 404, такы віруючі в попередніх списованях не были. Ку „іншым православным“ голосить ся 2 466 особ.

З великых традічных мадярьскых віроісповідань мож іщі спомянути кальвінів, котрых ся приголосило 943 982, і є то друга найвекша церьков по римокатоликах, а євангеликів, котрых жыє в Мадярьску 176 503. Но і тоты церькви стратили віруючіх в порівнаню з попередніма списованями.

Без віроісповіданя є 1 549 610 особ. Тых, котры не одповіли на вопрос о віроісповіданю, є 3 852 533. В році 2011 то было 2 698 844 особ, а в році 2001 лем 1 104 333.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА