Літманова є уж 10 років путницькым місцьом

На горі Звір в селі Літманова, окрес Стара Любовня, в днях 4-го і 5-го авґуста 2018-го року в рамках Юбілейного року Пряшівской архієпархії одбыв ся архієпархіалный одпуст. Літманова тот рік припоминать собі 10-ту річніцю од выголошіня за офіціалне путницьке місце Пряшівской ґрекокатолицькой архієпархії.

Одпустовый проґрам завершыв ся недільняйшов торжественнов літурґійов, котрой головным служытельом быв пряшівскый архієпіскоп і метрополіта Словакії Йоан (Бабяк). Святочнов проповідьов приговорив ся участным кардінал Йозеф Томко, емерітный префект Конґреґації про єнвагелізацію народів.

Окрем великого множества священиків і тісячів людей на церьковнім торжестві брали участь і далшы єпіскопы. Із Войводины пришов владыка Дюра (Джуджар), апостольскый екзарха про ґрекокатоликів у Сербії і в Чорній Горі, із Підкарпатя пришов владыка – помічник Мукачівской ґрекокатолицькой єпархії Ніл Юрій (Лущак), далше брав участь емерітный владыка – помічник Пражского апостольского екзархату Йоан Євген (Кочіш) і Андрей Імріх – емерітный помічный єпіскоп Спішской римокатолицькой діецезы.

Наймолодше путницьке місце

Гора Звір в русиньскім селі Літманова є наймолодше путницьке місце ґрекокатоликів на Словакії, днесь вєдно із Лютинов єдно із двох найвекшых.

В новодобій історії Літманова дістала ся до увагы головно в повязаню із зъявлінями Пречістой Дівы на горі, котра є приблизно пять кілометрів од зачатку села, недалеко граніці із Польщов. Правдивость тых дій є іщі все лем предметом баданя із боку Католицькой церькви.

Богородіця ся мала появити двом дівчатам, втогды 11-річній Іветі Корчаковій і 12-річній Катарині Чешелковій в деревянім майдані на луці під лісом. Богородіця собі мала желати, жебы дівчата і люди ходил на тото місце молити ся. Зъявліня тырвали од 5-го августа 1990-го року до 6-го авґуста 1995-го року. Нелем в тім періоді, но і по нім на тото місце в неділю по першій пятніці в місяцю, коли ся Богородіця появляла дівчатам, зачало ходити штораз веце людей.

На основі того, і кедь церьков дії іщі все бадать, втогды іщі пряшівскый єпарха Йоан (Бабяк) выголосив 6-го авґуста 2004-го року гору Звір за Місце молитвы. О штири рокы пізніше 7-го септембра 2008-року уж як архієпіскоп і метрополіта Словакії владыка Йоан выголосив гору Звір за Ґрекокатолицьке маріяньске путницьке місце Пряшівской ґрекокатолицькой єпархії.

Тот рік минать точно десять років од выголошіня наймолодшого путницького місця і зато быв тогорічный одпуст закомпонованый і до офіціалного проґраму святкованя 200-річніці од основная Пряшівской ґрекокатолицькой єпархії, котра у 1818-ім році одділила ся од Мукачова.

Жрідло фотоґрафії: grkatpo.sk

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА