Літературный тыжден в Войводині

Oд днес, 15. листопада/новембра 2019 р., зачынат ся серед бачваньскых Русинів культурна подія  пн. «Костельникова Осін». Буде то 26. едиция імпрезы. Подіі проходити будут протягом наступного тыжня в Рускым Керестурі, Кули, Коцурі та Дюрдьові, значыт в місцях, де жыє русиньскє населіня в Сербіі.

Традицийні першый ден «Костельниковой Осени» зачынат ся в школі ім. Петра Кузмяка в Рускым Керестурі од презентациі новых русиньскоязычных книжок. На вечер наплянувано літературно-музичный вечер в реставрациі «Червена ружа» і стрічу з писменниками. Того рока презентуваны будут найновшы творы Дюры Латяка, Ірины Гарди Ковачевич, Сильвестра Макая, Юлияна Тамаша, Олены Планчак Сакач, Сашы Сабадоша. Редакторка маґазину для молодых Русинів «МАК» Рената Джуджар вкаже найновшый Збірник Літературы Младых 2010-2020, а Мирон Джуня буде бесідувал о книжці Славка Романа Ронду «Одняти од псох». Гостьом вечера буде і писателька з Нового Саду Зденка Валент Белич.

На суботу, 16. листопада/новембра, заплянувано в основній школі в Кули Стрічу Рецитаторів «Михайло Зазуляк», а в Коцурі в Етно-Клюбі «Одняты од забытя» пройде вернісаж малюнків та літературно-музичный проґрам «На чест др. Г. Костельника». Неділя то літературно-музична стріча «Струны серця» в Дюрдьові. В будучым тыжни, в четвер, 21. листопада/новембра, в Коцурі в основній школі «Братство-єдинство» одбуде ся о 12.00 год. промоция русиньскоязычных книжок та стріча з писменниками, котра пройде і на вечер в Рускым Домі. В пятницю, 22. листопада/новембра, в Рускым Керестурі одкрыют выставу Емилиі Чызмаровой «Твітература з мура», в проґрамі є і промітаня шведского документального фільму «Сплав».

Посліднім дньом тогорічной «Костельниковой Осени» буде субота, 23. листопада/новембра. На тот ден в Домі Культуры в Рускым Керестурі заплянувано Округлый Стіл – Стрічы Рецитаторів, бесідувати будут о 50. річниці рецитаторского руху. В проґрамі є іщы одкрытя поконкурсовой фотоґрафічной выставы «Дньовкы» на тему «Руіны» та головный мултімедияльный проґрам од молодых, якій завершыт 26. «Костельникову Осін».

Тогорічна подія орґанізувана є в рамках празднуваня 100. річниці основаня Русиньского Нацийонального Просвітнього Общества, першой орґанізациі, котра забезпечала культурны і освітны інтересы войводиньскых Русинів. Більше найдете в тым дописі.

Фот. Фб Рускій Крестур, інфо за Рутенпрес