Літературный конкурз выграла Людмила Шандалова

У 2021-ім році Сполок русиньскых писателів Словеньска у співпраці з Академійов русиньской културы в Словацькій републіці і Інштітутом русиньского языка і културы Пряшівской універзіты в Пряшові зорґанізовав 8-ый рочник Літературного конкурзу Марії Мальцовской.

З причіны продовжуючой пандемії і з тым повязаныма обмеджінями і резултаты того рочника были выголошены лем онлайн, єднако як в попереднім році. Найліпшы, дотеперь непублікованы творы од русиньскых авторів із Словакії сьме могли спознати у онлайн высыланю в послідній день минувшого року, 31-го децембра.

В конкурзі быв і драматічный твор

Як в рамках выголошіня резултатів інформовала Кветослава Копорова, голова Сполку русиньскых писателів Словеньска, до 8-го рочника конкурзу, котрый має назву по вызначній русиньскій писательці Марії Мальцовскій, ся приголосило довєдна девять авторів. Тот рік окрім прозаічных творів і поезії так само быв приголошеный драматічный текст, котрый в рамках святочного выголошіня одзвучав обробленый у формі радіовой пєсы.

З прозов до конкурзу приголосили ся Штефан Смолей, Марія Шмайдова і Мірослав Жолобаніч. Поетічны творы загнали Мілан Ґай, Гелена Ґіцова-Міцовчінова, Юрко Харитун, Елена Хомова-Гріньова і Людмила Шандалова. З драматічным текстом під назвов Місія представив ся в конкурзі Владислав Сивый.

Тричленна журі вырішыла, же перше місце  у 8-ім рочнику Літературного конкурзу Марії Мальцовской належыть за поетічны творы Людмилі Шандаловій. Друге місце обсадив Владислав Сивый із своїм драматічным твором, третє місце присудила журі Елені Хомовій-Гріньовій.

Людмила Шандалова

Людмила Шандалова (1964 р.) має дотеперь выданы штири книжкы. Збірку дітячіх стишків Подьте, дїти, што вам повім (2014 р.), прозу Червеный берег (2016 р.) і далшы дві збіркы поезії про діти під назвами Ани бы сьте не вірили (2018 р.) і Напю ся водічкы (2020 р.). Окрім того написала пять театралных дітячіх пєс.

У 2015-ім році дістала за свій дебут Премію Александра Духновіча за русиньску літературу. У 2017-ім році за прозу Червеный берег уділив їй словацькый Літературный фонд Ціну Александра Павловіча.

Перше місце в Літературнім конкурзі Марії Мальцовской здобыла уж в році 2019. У 2021-ім році здобыла їй книжка духовной поезії про діти Напю ся водічкы Ціну публікы в рамках інтернетового голосованя в конкурзі з назвов Книжкы рока Пряшівского самосправного краю 2020.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА