Літературный конкурз выграла дебутантка Леа Васькова

В пятніцю 20-го децембра 2024-го року в просторах Consilium maius Ректорату Пряшівской універзіты В Пряшові одбыло ся выголошіня резултатів 11-го рочника Літературного конкурзу Марії Мальцовской.

До конкурзу, котрый шторік орґанізує Сполок русиньскых писателів Словеньска, можуть авторы із Словацьой републікы заганяти творы, котры іщі не были перед тым публікованы. Тот рік свої тексты загнало сім авторів, в конкурзі была поезія і проза.

Із семох авторів аж трьоми тот рік были дебутантами, котры до конкурзу загнали творы першый раз, і котры не мають выдану жадну книгу. Творы оціньовала фахова журі в складі Кветослава Копорова – председкыня Сполку русиньскых писателів Словеньска, Михал Павліч і Аліца Вєтошевова.

Меджі неоціненыма авторами зістали тот рік Миколай Коневал, Мірослав Жолобаніч і Моніка Даґан, котра у конкурзі дебутовала з прозов про діти.

Журі вырішыла, же тот рік уділить дві треті місця. Здобыла го далша дебутантка – Анна Замутовска із прозовым твором під назвов Подобы, а Марія Шмайдова, яка уж має выданы книгы а до конкурзу загнала прозу з назвов Алменія і лопуховый лист.

Друге місце тот рік журі приділила Людмилі Шандаловій, котра в конкурзі змагала ся із поезійов. Перше місце здобыла Леа Васькова, третя з тогорочных дебутантів, котра до конкурзу загнала так само поетічны творы.

Перед выголошіньом резултатів 11-го рочника Літературного конкурзу Марії Мальцовской одбыла ся членьска громада Сполку русиньскых писателів Словеньска, в рамках котрой членове потвердили свої орґаны, обговорили планы до 2025-го року, а так само занимали ся різныма проблемами, з котрыма писателі стрічають ся.