Літературный фонд нагородив Маріяна Марка за ціложывотне діло

В понедільок 9-го децембра 2024-го року Літературный фонд (Literárny fond) передавав нагороды за ціложывотне діло і вырочны нагороды в области радія, театру, телевізной творчости і забавного уменя.

Як інформовала аґентура TASR, особности театралной, дабінґовой, радіовой, телевізной і театролоґічной творчости собі оцініня перевзяли в Палаці Зічія в Братіславі. Председа комітету Секції про творчу роботу в области радія, театру і забавного уменя Светозар Спрушаньскый в приговорі на святочній події повів, же за попередню сезону уділили 16 нагород за ціложывотне діло, 24 вырочных нагород і 98 премій.

Меджі нагородженыма суть і директор Театру Александра Духновіча (ТАД) Маріян Марко, а член драматічного колектіву ТАД Євґеній Либезнюк. Марко дістав нагороду за ціложывотне діло. Либезнюк собі перевязв вырочну нагороду за роль Ромула Великого в інсценації з єднаков назвов, як і за роль Поцца в пєсі Чеканя на Ґодота.

Якраз в пєсі Ромул Великый на сцені Театру Александра Духновіча грають обидвоми нагороджены.

Маріян Марко (р. 1962) почінав в аматерьскім драматічнім колектіві Думка в Кошыцях. У 1983-ім році наступив як елев драматічного колектіву втогдышнього Україньского націоналного театру в Пряшові, днешній русиньскый ТАД. В роках 1984 аж 1988 быв посланый на штудії акторства до Києва, де закінчів Київскый державный інштітут театралного уменя Карпенка-Карого. По штудіях став рядным членом драматічного колектіву. У 1999-ім році быв выменованый на посаду директора театру, і в тій функції є доднесь.

Почас свого професійного жывота співпрацовав з аматерьскым драматічным колектівом в Меджілабірцях, учів на конзерваторії, быв основательом меджінародного театралного фестівалу Карпатфест ці членом порадного орґану директора Словацького народного театру в Братіславі. Є так само довгорічным председом журі на декламачнім конкурзі Духновічів Пряшів, котрый орґанізує Русиньска оброда на Словенську.

В януарі того року презідентка Словацькой републікы Зузана Чапутова уділила Маріянови Маркови Прибинів крест ІІ. класы за вынятковы заслугы о културный розвиток Словацькой републікы.

Фото: TASR.