Літературно-вытварный конкурз Рік русиньского языка

Основна школа з матерьсков школов з навчалным языком русиньскым в Кленовій орґанізує Літературно-вытварный конкурз Рік русиньского языка про школярів матерьскых і основных школ, а штудентів середніх школ і ґімназій в Словацькій републіці.

Приносиме вам штатут конкурзу, котрый є выголошеный од 10-го фебруара до 9-го юна 2025-го року.

Штатут конкурзу

РІК РУСИНЬСКОГО ЯЗЫКА

Выголошоватеъ конкурзу: Základná škola s materskou školou s vyučovacím jazykom rusínskym –  Основна школа з матерьсков школов, Klenová 111

Назва конкурзу: „Русиньскы приповідкы“ – Літературно-вытварный конкурз Рік русиньского языка

Замір конкурзу: З нагоды юбілейных 30 років од кодіфікації русиньского языка Округлый стіл Русинів Словакії выголосив рік 2025 за Рік русиньского языка. Основна школа з матерьсков школов з навчалным языком русиньскым в Кленовій, як выголошователь конкурзу, вас запрошує приголосоти ся до цілословацького Літературно-вытварного конкурзу Рік русиньского языка 2025.

Богатство каждого народа є в його народній словесности. Дотварять мозаіку пестрой културной дідовизны. Приповідкы творять дітині світ добра і зла, розвивають його фантазію а помагають заховати материньскый язык.

Як ся можете до конкурзу приголосити:

1, Посередництвом властной авторьской літературной творчости на тему Русиньскы приповідкы. (Або бісідованя приповідок і пригод старых родiчів, прародiчів а наслiдно їх записати, може быти в латинiці.)

2. Поcередництвом вытварных творів, котры будуть зроблены будьяков техніков із слуханых звуковых mp3 награвок русиньскых приповідок (выберьте собі будьяку), котры найдете на сайті радія русин ФМ.

Заміром конкурзу є позітівно іншпіровати діти і школярів, жебы в своїх вытварных або літературных творах выразили свої чутя і постой к русиньскій културі, народу і русиньскій ідентіті.

Правила конкурзу:

1, Конкурз буде проходити од 10. фебруара 2025 р. до 9. юна 2025 р.

2. Катеґорії конкурзу: 1-ша катеґорія: матерьска школа, 2-га катеґорія: 1. – 4. класа ОШ, 3-тя катеґорія: 5. – 9. класа ОШ, 4-та катеґорія: середні школы і ґімназії.

3. Школы выголосять школьскы кола, в котрых выберуть в каждій катеґорії три найшумнішы творы, і в терміні нам їх заженуть на адресу Základná škola s materskou školou Klenová 111, 06772. Єдночасно треба вшыткы творы на задній сторінці означіти: назва твору, мено і призвіско автора, школу, вік, катеґорію і класу. Максімалный формат твору є A3. Літературны творы так само.

4. Конкурз буде проходити в трьох етапах – школьскы кола, окресне коло і цілословацьке коло. До цілословацького кола поступлять три творы в каждій катеґорії з каждого окресу.

5. В рамках конкурзу є зряджена тричленна порота з области літературно-вытварного уменя. Задачов той пороты буде выбрати три вытварны творы з каждой катеґорії з каждого окресу, котры поступлять до цілословацького кола. Потім з них выбере порота в каждій катеґорії три вітязны творы. Авторы будуть нагороджены цінами.

6. Часовый гармоноґрам:

10. фебруар 2025 р. – Выголошіня конкурзу; Фебруар, марец, апріль, май – Реалізація школьскых кол; 9. юн 2025 р. – Посланя творів на адресу школы; 13. юн 2025 р. – Оцiньованя творів подля окресів; 18. юн 2025 р. – Оціньованя творів у цілословацькім колі; 25. юн 2025 р. – Выголошіня резултатів конкурзу Рік русиньского языка.

7. Членове фаховой пороты:

ПаедДр. Светлана Цімбакова – учітель про І. ступінь в ОШ з МШ Кленова, Марія Ґірова – русиньска писателька, Іван Ґазій – довгорічный педаґоґ вытварного уменя, його творы суть у пріватных звірках у веце країнах.

Aдреса і контактна особа про посыланя творів:

Marcela Ruňaninová, Základná škola s materskou školou s VJR, Klenová 111, 067 72 Klenová, Slovenská republika.

Контактны даны выголошователя:

Základná škola s materskou školou s vyučovacím jazykom rusínskym – Основна школа з матерьсков школов, Klenová 111, IČO: 37873571, DIČ: 2021640148, код зряджователя: 509230, імейл: zsklenova111@gmail.com, тел.: +421907588285, тел.:+421 57 7696128.