Липец місяцьом ватр

Найближшы два тыжні несут культурально-розрывковы подіі, котры сут цікавом офертом для легкого, родинного одпочынку. В Ждыни, в днях 18.-20. липця буде проходила Ватра, котра є найбільшом масовом імпрезом в ґорлицкым повіті. В рамках подіі сут артистычны выступы, презентациі выдавництв, як і спортовы змаганя. Барз богату гандльову оферту з ріжного рода етно-сувенірами дополняют чысленны ґастрономічны стоіска. В проґрамі Ватры, попри молодіжных украіньскых ансамблях “Los Colorados” з Тарнополя, або “The Vyo” з Кыйова,  находят ся тіж ансамблі презентуючы м.ін. лемківску творчіст, як напр. “Надія”, “Lemko Tower” ци “Кычера”. Вступ на Ватру в Ждыни є платний, а імпреза буде проходила під патронатом Міністерств Культуры Украіны і Польщы.

О тыжден дальше 25.-26. липця, на другым кінци Польщы, в Лугах, буде проходила подібна формом імпреза, лем о кус барже камеральным вымірі, але за то в барз реляксуючых обставинах. Ватра в Лугах орґанізувана є над озерком і характеризує ся приємном, родинном атмосфером. Звіздом тогорічной едициі є украіньска ґрупа АСТРАТА і RUSÍN ČENDEŠ ORCHESTRA зо Словациі. Окрем того заграют молодіжны лемківскы ансамблі 7кропка, Бурян і Припадок. 

Вшыткы дрібниці про ватры найдете пониже на афішах.

В першый тыжден серпня одбуде ся наступна Ватра, орґанізувана Стоваришыньом Лемків. Є то Ватра о барже патріотычным характері. Про тоту подію будеме інформувати в окремій відомости, як лем дознаме ся од орґанізаторів даякых дрібниц.