Лідер клавніады

Кебы Петро Ґецько так любив свій народ, не уближовав бы му смішнов, першоплановов московсков пропаґандов. Лемже Петро Ґецько є тіпічный клавн. Розвеселить свою публіку, а притім внутрі себе самого є порожній нещастливець, котрого чекать смутный конець. Шкода, же до свого нещастя тягне і другых.

Обіцяв єм собі, же мено Петра Ґецька буде в коментарях табу. Найголовнішов причінов того рішіня было, же за моїм особным поглядом є споминаня Петра Ґецька в будьякім контексті величезна хыва. Є то в будьякім смыслі, і кедь го чоловік кріткує і окдрыто дементує його высловы, наконець лем PR про чоловіка, котрый собі то абсолутно не заслужыть.

Єдночасно ся тым чоловік як рыбка поїмать на гачок, котрый Москва шмарила до воды. Не залежыть, ці сьте согласны з Ґецьком, але пишете о тім. Його лож ся пошырює.

І так єм досправды самозваного лідера Русинів, самозваного премєра якойсь „русиньской републікы“ успішно іґноровав, аж на пару вынятків. Было то в роках 2014 і 2015, коли україньскы медії писали о його выголошінях, і на основі них вшыткых Русинів обвиньовали із сепаратізма. Од того треба было діштанцовати ся.

Но наперек тому, же русиньска позіція была ясна, же Русины поясняли, же Ґецько не є представительом Русинів, же не має контакт із жадныма русиньскыма орґанізаціями, же ся дементовали його выголошіня, а же, за моїм поглядом, ани себе самого уж не заступать, сепаратізм ся вдяка „лідерови“ тягнув з Русинами далше.

Медії на Україні, о причінах уж най собі каждый зробить образ сам, были тыма рыбками, котры ся хопили на його гачок. Повторяли то, включно україньской редакції Радіо Свобода, і так ня то лем утвердило в тім, же найліпше є його мено, особу, што бісідує, абсолутно іґноровати. Тым зробиме найліпше. Бо кедь ся буде іґноровати, пак така особа без значіня і його відео приговоры будуть мати досяг такый великый, кілько є центіметрів меджі його головов і камеров, кедь робить відео.

Но днесь єм, вынятково, переломив табу з назвов Ґецько. Причінов є, же Ґецько ани теперь, кедь іде война на Україні в повній силі, не мать жадного сумліня.

Як вовірка на діскотековых наркотіках точіть єдно відео за другым, і „од Русинів“ робить зверненя до Путіна, жадать выголошіня републікы Карпатьска Русь, причім раз му русиньскый флаґ робить стафаж коло російского, іншый раз коло совітьского. Того совітьского, під котрым Русины протерпіли уж доста.

Кедь ся буде Петро Ґецько іґноровати, пак така особа без значіня і його відео приговоры будуть мати досяг такый великый, кілько є центіметрів меджі його головов і камеров, кедь робить відео.

Де є сумліня Петра Ґецька? Де розум? Де любов до властного народа? Якый то чоловік, котрому не перeшкаджать, же уж зарань можуть быти на фронті його родаци – Русины, і вмерати там, або же уж завтра може войско Путіна бомбардовати і його родный край? Якый то чоловік, котрый ся не задумує над тым, што своїма выголошінями може запричінити Русинам, головно теперь, почас войны, кедь пущать до ефіру дурніці, з котрыма жадна релевантна русиньска орґанізація ани на Підкарпатю, ани у світі не є согласна?

Добров новинов є, на розділ од років 2014 і 2015, же в теперішній сітуації уж і в україньскых медіах мож видіти першы ластівкы дакус іншого приступу, як то было втогды. Уж і они, мам надію, зачнуть поступно розуміти, же Ґецько є інштрументом московской пропаґанды, а не представительом Русинів.

Ясно то окоментовав тот тыждень україньскый новинарь і політік Сергій Лещенко, же то чіста фейкова московска пропаґанда, і Русины на Україні жадны такы планы, як бісідує Ґецько, не мають. Бодай бы з Лещенка взяли приклад україньскы медії, і не пошырьовали лож, котра з Русинами нич не має довєдна.

Навеце, „лідер“, як спомянув Лещенко, має на своїм Телеґрамі, де свої выголошіня пошырює, „аж“ 400 людей. Припомяну, же на Словакії має така Русиньска оброда коло 900 членів, Общество св. Йоана Крестителя коло 600. Ґрупа на сіті Facebook із будьякыма дурніцями понад 51 тісяч членів. Петро Ґецько, лідер Русинів, знать ословити з цілого світа 400 людей.

Петро Ґецько не любить ани свій народ, ани свій край. Кебы любив, не робив бы тото, што робить, а уж нияк втогды, кедь є война. Ґецько є уж лем маріонетка в руках Кремля. Він не є жадным русиньскым лідером.

Покля є лідер, пак є лідер клавніады, в ціркусі, котрого прінціпал сідить в Кремлі. Бавить свою кремльовску публіку, але внутрі самосого себе є порожній нещастливець. Тіпічный клавн. Лемже тот ціркус ся раз розпустить. Пак будеме видіти плакати і клавна. Не буде про нього місця ани там, де є теперь, а уж нияк не дома, меджі Русинами.

Статя была написана як коментарь „Вступне до контроли“ лемківского радія lem.fm. Фото: Pixabay.com.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА