ЛемОн, Серенча, Оркєстра Св. Миколая… кого іщы почуєме на тогорічных Днях Ґорлиц?

Ґорлицкій Центр Культуры враз з Урядом Міста в Ґорлицях, як в попередніх, так і того рока, рыхтуют для своіх мешканців, вельо атракцийних концертів, а вшытко в рамках Днів Ґорлиц 2017. То выняткове свято міста, вчас котрого вшыткы Ґорличане повинны ся добрі бавити. Ріжнорідны ансамблі запрезентуют ся на ґорлицкій сцені уж неодолга, а докладні на переломі квітня/апріля і мая текучого рока.

В рамках Днів Ґорлиц пройде наступна едиция фестівалю «4 стороны Карпат», коли на ґорлицкым рынку вызвучыт фолькова музыка. Сеса дводньова подія одбуде ся 29. і 30. квітня/апріля 2017 р. Выступлят м.ін. Серенча, Оркєстра Св. Миколая, Требунє Туткі, Капеля Ганкі Вуйцяк, Кжікопа, Волосі і Доґадана. Тота ріжнорідніст ансамблів дає можливіст почути не лем вельоязычны творы, але тіж, окрем фольку, перевинут ся і інчы музычны стилі. Но-ле, детальнійше пізрийме, кого буде мож видіти на Днях Ґорлиц.

Серенча то лемківскій ансамбль, оснований в 1997 р. через Романа Корбича, Петра Квоку і Мирослава Трохановского. В іх творчости лемківска музыка преображала ся на просторі років в барже сучасний, хоц дале акустичний фольк. Іх аранжациі дают інче пізріня на фольклор, котре дозвалят дотерти до сучасного слухача, помагат пропаґувати лемківску культуру.

Оркєстра Святого Миколая то ансамбль покликаний в 1988р. Іх розпознавальном прикметом сут акустичны звукы ци білий спів. В своім репертуарі мают музыку інспірувану славяньскым музычным фольклором, м.ін. польскым, лемківскым, хоц іх музычны прогулькы часто ідут далеко дальше.

Капеля Ганкі Вуйцяк є краківскым ансамбльом, котрий выконує музыку з погранича фольку, ворд-мюзік та авторской пісні. В іх выконанях мож чути влияня орієнтальной і кельтской музыкы, польскы народны мотивы, поламаны ритмы і вельо вокальной імпровізациі.

Требунє Туткі то музыкуюча од поколінь ґуральска родина, котра перешла еволюцию од народной капелі по ансамбль, концертуючий на найвекшых фестівалях в Европі, Азиі і Пілнічній Америці. Своє кореінне граня розвивают і збогачют о новы мельодиі, сучасны тексты і аванґардовы аранжациі.

Кжікопа грат традицийну музыку Выжнього Шлеска, з котрой выдобывают єй натуральну красу і помпуют велику порцию енерґіі, новых звуків і ритмів. Получыня полькы з електро і кубаньским кляве, або шлезского вальчыка з балканьскыма мотивами і геві-метальом сут для Кжікопы дивны лем на папері.

Волосі, ансамбль выходячий поза вшелеякы клясифікациі, сотворил абсолютні ориґінальний музычний стиль. Ломлячы традицийны границі граня на смыковых інструментах, творят модерну і атракцийну для сучасного слухача музыку, котра іде з карпатскых коренів, але несе з собом елементы джазовой імпровізациі, наладувана роковом енерґійом, полном емоцийоного переказу.

Даґадана то польско-украіньскій квартет, котрый лучыт ріжны музычны стилі – джаз, фольк і електронічна музыка.

Концерт зачне ся в суботу, 29. квітня/апріля о 17.00 годині. Того дня выступлят Серенча, Оркєстра Св. Миколая, Капеля Ганкі Вуйцяк і Требунє Туткі. Другы ансамблі буде мож слухати і видіти од 18.30 год. в неділю, 30. квітня/апріля.

Але то не конец атракций, якы місто Ґорлиці зрыхтувало для своіх жытелів. Уж 2. мая буде мож почути выбрану самыма Ґорличанами звізду тогорічных Днів Міста – ансамбль ЛемОн. То, як раз, они кількістю голосів перемогли інчы ансамблі в фейсбуковым голосуваню.

Як відомо, каждому любит ся дашто інче, зато тым разом ґорлицкій Уряд Міста дал своім мешканцям можливіст выбрати ансамбль. Голосуваня одбыло ся через ґамбокнижку іщы кінцьом минулого рока. Артистів выбрано на основі суґестиі ґорличан і пропозициі Молодіжной Рады Міста. Конечні, 14. вересня/септембра 2016 р. дознали сме ся, же то ансамбль ЛемОн почуєме на тогорічных Днях Ґорлиц.

ЛемОн – тепер уж мож повісты – ансамбль великых сцен, з Ігорьом Гербутом на челі. Іх амбітна музыка зыскала собі вельо любителів. Мают на своім конті барз дуже сукцесів, але фурт ідут допереду, ставляючы собі штораз то новы цілі. Іх найсвіжший успіх то выдана недавно (24. марця 2017 р.), четверта уж платня. Обертаючы ся наштоден в великым світі вокалиста, не забыват єднак о своіх корінях. Як бесідує Ігор Гербут, 40% новой платні зродило ся на Лемковыні, до котрой сам вокалиста заєдно вертат, споминат о ній – фурт має она для него великє значыня.

Концерт пройде на Рынку, а старт плянуваний є на 20.00 год.. Тот, і другы концерты орґанізуваны в рамках Днів Ґорлиц – безплатний.