Лемкы здомінували “Кромера”…

Текст прислала Мария Дубец, учениця І клясы І Ліцею ім. М. Кромера в Ґорлицях

Остатнім часом в І Ліцею ім. М. Кромера в Ґорлицях діяло ся барз лемківско. Перше, бо 1. квітня, в зорґанізуваным школом Kонкурсі Співанкы, в котрым участ взяло парунадцет ґруп і солістів, І місце занял квартет: Марися Дубец, Юстина Хомяк, Клавдия Ракочы та Фома Дошна. Серця жырі, котрым были вшыткы ученикы школы (!) присутны на публиці, підбили лемківском співанком “Ой летіли гусонькы” і украіньском – “За гору сонце загоряє”.

Наступного дня, 2. квітня, в цілым будинку школы дало ся чути специфічний запах теплого воску – од самого рана ученикы лемківского языка розкладали фарбы, пальникы, одповіднє нарядя. Не перший уж раз, в школі проходил показ батканя великодных яєц. Дівчата, вправлены в штуку малюваня яєц, охочо презентували заінтересуваным богатство взорів і помагали тым, котры самы підняли ся пробы батканя. Оповідали тіж попри тым о великодных традициях серед Лемків.

Ґрупа остала принята барз тепло, видно было, же і ученикам і учытелям такы варштаты барз ся подабали. Окрем варштатів в школі, лемківска ґрупа презентувала ся тіж на отвертых торгах понадґімназияльный шкіл, орґанізуваных Містом Ґорлиці 30. марця т.р. на спортовій гали в Ґорлицях.

За удоступніня знимок з обох подій (авторства Наталиі Ставярской та Максимілияна Шымчака) сердечні дякуєме редакциі сайту www.obczajkromca.pl