Лемкы з Мужынова просят на маівку

Мужыново то село положене на Заході, близко Ґожова Великопольского. Од деякого часу фунґує гын Стоваришыня Лем-Разом. В найблизшу суботу в тій місцевости пройде «Лемківска маівка». Про деталі імпрезы оповіл ведучый Лем-Разом, Андрий Дзвінчык.

На подію просит ся каждого, кому близка єст лемківска культура. Як поінформувал головный орґанізатор, локальне Стоваришыня Лем-Разом діє од семох років. Уж другій раз орґанізуєме перегляд лемківскых ансамблів. Плянуєме нашу подію на 18 мая, на 14.00 год. Хотіл бы-м сердечні вшыткых запросити, бесідує А. Дзвінчык. Імпреза єст переглядом предовшыткым лемківскых ансамблів. В суботу запрезентуют ся м.ін. ЛАПіТ «Кычера» з Ліґниці, Розтока з Рудной, Крамбабуля з Познаня ци ґрупа Л4 зо Шпротавы.

Хотіл бы-м, жебы дописала публика. Коли буде нас дуже, то надію ся, зробиме третю і наступны едициі нашой маівкы. Коли буде нас дуже, то будеме мочы побесідувати на ріжны темы, поспівати, окрем позераня на выступы ансамблів. Андрий Дзвінчык надіє ся, што з рока на рік буде штораз більше охочых прити на лемківску імпрезу до Мужынова. Хтіл бы-м, жебы было штораз веце Лемків, же закля тото наше поколіня іщы жыє, жебы сме ся інтеґрували (…), продолжал бесідник.

В проґрамі «Лемківской маівкы» окрем концертів предвиджено атракциі про наймолодшых, як тіж ґастрономію. На вечер, по 20.00 год. в Мужынові зачне ся лемківска забава. Як зазначыл Андрий Дзвінчык, Стоваришыня Лем-Разом достало од бургомайстра Сквєжыны поміщыня, в котрым медже інчыма зорґанізувало музей. Тото наше поміщыня не єст мале, а при нагоді сме выґаздували такій єден кутик, в котрым зорґанізували сме наш музей. Маме в ним нашы експонаты, зобраны од нашых люди, старшого поколіня, котры іщы жыют. Каждый експонат буде описаный, од кого єст (…) – завершат А. Дзвінчык.