Лемкы на трасі змагань «Лемковина Ультра Трейль»

В тогорічній едициі змагань в літаню Лемковина Ультра Трейль, якы проходили в минулий вікенд 23.-25. жолтня/октобра тр. на обшыри Лемковины, участ взяло близко 1000 спортовців! Дост єм ся зачудувал, коли взріл єм влітуючых на фініш заводників з фаном, з яком до кінця не был єм зазнаємлений – бесідує директор маратону Кжыштоф Ґайдзіньскі (інтервю з рыхтувань до змагань найдете гев). Яка то была фана? Отже, незмірні мило нам поінформувати, же в тых престіжовых змаганях взяла участ делеґация Лемків, а фана была синьо-помараньчово-зелена.

Не дост, же репрезентанты Лемків мусіли перебыти десяткы кільометрів вчас змагань, то іщы соткы іх, жебы доіхати на Лемковину, зато же ціла делеґация приіхала аж зо заходу. Наступном трудністю было для нас літаня по горах, де сут значучы перевысшыня, a, што більше, траса не была легка – вела през тяжко доступны місця, лісы і лукы, было великє болото – реляцийонує Андрий Прибыло, двадцетпаролітній Руснак з Лісця, абсольвент гірничого выділу Вроцлавской Політехнікы, наштоден штиґар в любіньскій копальни, гоббистычні занимат ся пчолярством.

До змагянь зачали сме ся рыхтувати даякє 3 місяці тому, некотры барже реґулярні, інчы кус меньше – бесідує дале Андрий Прибыло. І хоц тренувати зачали, здавало бы ся, дост пізно, як на такє вызваня, то вшыткы докінчыли підняты трасы. Окрем Андрия Прибыло, якій летіл на трасі 30 км, одлегліст з Пулав до Команьчы скінчыл іщы Ярослав Пласконь, чынний пожарник (абсольвент Школы Аспірантів Державной Протиогньовой Стражы в Познаню) та єдина женьска репрезентантка – Емілия Ґардоцкі, з походжыня Лемкыня з Рыхвалду і Підляшучка, роджена в ЗША, тепер студентка ІІІ рока стоматолоґіі Медычного Університету во Вроцлаві. Легше летит ся разом, бо по дорозі приходит момент заламаня і мож ся спільні мобілізувати – оповідат дале А. Прибыло. На мету влетіли разом з Емілийом, та і приватні сут паром. По правді, то лем квестия психікы, кєд хочеш – долетиш – твердит. Трасу скінчыли, маючы іщы годинний запас ліміту часу передвидженого на тот дистанс орґанізаторами. З ліпшым результатом долетіл Ярослав Пласконь. Докладны часы найдете за тым мотузком. Звернийте увагу, якій спортовий клюб репрезентували (для нетерпеливых і жадаючых інформаций – одраз подаме уж в тым місци – клюб Руснакы :)).

Головным учутьом на меті єст щестя – бесідує Андрий. Щестя на певно чули тіж Петро Левкович і Кристиян Трохановскій, якы покусили ся выстартувати на трасі о долгости аж 70 км і перевысшынях +2520 м/-2520 м. Старт был в Гыровій о 7.00 год., але в бюрі змагань треба было ставити ся уж медже 5.00-6.00 год., а скорше іщы доіхати на місце. Того дня треба было стати уж о 4.00 год. рано. Мета трасы, подібні як вшыткых інчых, была в Команчы. Кристиян Трохановскій долетіл по 10 годинах з минутами, а по нецілых 26 минутах за ним, змаганя скінчыл Петро Левкович. Кристиян Трохановскій то, подібні як Андрий Прибыло, абсольвент Вроцлавской Політехнікы. Робит в Округовым Гірничым Уряді во Вроцлаві, а в свобідным часі грат на гушлях і співат в ансамбли 7кропка. Ґрупа тота, недолга, 21. листопада/новембра тр., запрезентує ся на І Фестівали Авторской Лемківской Творчости «Молода Лемковина» в Ґорлицях. Вшыткы хлопці сут бывшыма членами ансамблю Кычера, подібні Петро Левкович, якій окрем того єст барз одважном і цікавом світа особом – зъіздил уж такой піл світа, не лем з выступами з Кычером, але головні здобываючы освіту і практыку, м.ін. на університетах в Анґлиі, Швециі, Німцях, а остатньо навет і в Японіі(!), де писал маґістерску роботу на Медженародовых Студиях Космічной Інжынєриі на Університеті в Токіо. І хоц мат лем 25 років, його резуме робит вражыня – досвідчыня в світовых фірмах старчыло бы на пару осіб. Тепер вернул до Польщы і – як твердит – неодолга зас явлю ся в горах. Выізд на «Лемковина Ультра Трейль» был його першым в горах од 4 років.

Головна част змагань тілько што за нами, довершаме іщы остатні орґанізацийны справы тогорічного ЛУТ, а, по правді, мусиме уж думати о будучым році – реляцийонує Кжыштоф Ґайдзіньскій, директор маратону. Кєд вшытко замірене піде по воли орґанізаатора, од будучого рока «Лемковина Ультра Трейль» буде частю «Ultra-Trail World Tour» – Погару Світа, 11 найбільшых ультрамаратонів (дистансы мін. 100 км), якы своі трасы мают в Хінах, Новій Зеляндиі, Мароку, Австралиі, Японіі, Іспаніі, Портуґалиі, Італиі, Швайцариі, Франциі і ЗША. То елітарны і престіжовы змаганя, на котры зъіжджают ся спортовці з вшыткых кутичків світа. Ждеме на опінію решты амбасадорів Погару Світа, єден з них, якій был присутний на тогорічній едициі ЛУТ, выіхал з барз позитывным рапортом – тішыт ся К. Ґайдзіньскій. Іщы того рока вкаже ся, ци ЛУТ долучыт до той ексклюзывной ґрупы змагань. Кєд так, на другій рік участників може быти не 1000, як тепер, а 2000, або і більше. Під орґанізацийным взглядом то уж велика махіна, зато хочеме покликати фундацию, бо сам з женом, плюс волонтеры в кінцьовым етапі, не будеме в силі того добрі зорґанізувати – бесідує К. Ґайдзіньскій – найбільшом трудністю буде найдіня одповідніх спонсорів.

Надієме ся, же не лем спонсоры ся найдут, але же і амбасадоры Погару Світа познают ся на Лемковині, так як зробили тото уж соткы участників ЛУТ. Західнякы потверджают, же на будучий рік напевно вернут на маратон, а може, за час до наступных змагань, являт ся в рідных горах, жебы дакус потренувати?