“Лемковині многая літа” – реляция з одкрытя пропамятной таблиці о. Александрови Духновичови, част ІІ – віторок, 20.00 год.

Реляция з другой части Дня Русина на Лемковині днес о 20.00 год. Буде мож послухати Духновичового проґраму, прирыхтуваного дітми з ґрупы “Бабчына співаночка” з Чынадієва, недалеко Мукачева і ансамблю “Терочка” з Руской Бурсы в Ґорлицях.

Головном частю торжества нацйонального свята Русинів на Лемковині было одкрытя пропамятной таблиці, присвяченій отцю Александрови Духновичови, котре прошло 5. грудня/децембра 2015 р. в Рускій Бурсі в Ґорлицях. Рано делеґаты Русинів пришли ґу гробови Александра Духновича в грекокатолицкій катедрі в Пряшові, помолили ся і поклали квітя од Лемків. Пак, пішли під памятник Александра Духновича і там поклали вінец.

О 15.00 год. в Рускій Бурсі в Ґорлицях зачала ся офіцийна част свята. Пришли делеґациі з Підкарпатской Руси з предсідательом Народной Рады Русинів Закарпатя – Євгеном Жупаном. З Пряшівщыны делеґациі двох містных орґанізаций Русиньской Оброды на Словациі. З Пряшова Петро Медвідь і староста Біловежы – Петро Мікула. З Польщы были присутны члены заряду Стоваришыня Лемків, а дале чысленны гості. До Руской Бурсы пришол і настоятель Хрестовоздвиженьского Катедрального Собору в Ужгороді – протоєрей Димитрий Сидор, котрий пришол довєдна з отцьом Константином і соспільным діячом – Александром Русином.