Лемковина Ультра-Трейль не одбыла ся. Надія на стрічу в будучым році

Як інформували орґанізаторы, тогорічны змаганя в літаню Лемковина Ультра-Трейль не одбыли ся. Причыном єст фурт розвиваюча ся пандемічна ситуация, котра не дозволила зорґанізувати тогорічну осінню едицию. Мала она проходити в днях 24.-25. жолтня/октобра.

На сайті подіі пише ся, што орґанізаторы через пару годин міцно задумували ся над тым, як розвязати проблем. Скінчыло ся рішыньом, што тогорічны змаганя конечно мусят быти перенесены на будучый рік. Інформация про одкликаня осінньой едициі была спричынена предовшыткым новыма ограничынями, введеныма через уряд влады.

В комунікаті пише ся, што орґанізаторы так ци інакше годны бы были забезпечыти подію на найвысшым рівни, спілпрацуючы з найліпшыма медичныма екіпами. Пояснено і, што обтяжыня медичного персонелю в послідніх місяцях єст за великє, жебы ризикувати хоц бы довезіня потерпілых участників амбулянсом до шпыталя.

Што більше, част люди заанґажуваных в шторічну орґанізацию Лемковины Ультра-Трейль, прим. волонтеры, обнята была кварантанном. «Зробили сме направду вшытко, жебы сме могли ся стрітити в Низкым Бескіді, але тым разом то дост ризиковне. Для нашой команды, ментально, орґанізацийні, а тіж і фінансово, гірша од актуального сценария была бы лем єдна річ – одкликаня імпрезы в пятницю, хвилю перед […]», пише ся в комунікаті.

На сайті акциі мож чытати актуальности про тото, як перенести впис з осінньой едициі на едицию в будучым році. Орґанізаторы – полны надіі – просят на дальшу Лемковину Ультра-Трейль, заплянувану на 14.-16. мая 2021 р. По дорозі сут заплянуваны іщы зимовы змаганя (20.-21. лютого/фебруара 2021 р.), але і тоты будут залежны од ситуациі звязаной з пандемійом коронавіруса.