Лемко Союз припомяне жертвы акциі «Вісла» і лаґру Явожно

1. жолтня/октобра т.р. в Стемфорді в штаті Коннектікет в ЗША пройде ден нацийональной памяти про выгнаня з 1947 р. та припомніня лемківскых жертв польского комуністичного Центрального Лаґру Працы Явожно. Орґанізатором подіі є найстарша лемківска орґанізация в Америці – Лемко Союз. 

В рамках проґраму дня памяти о 15.00 год. в стемфордскій церкви Успіня Пресвятой Богородиці (141 Den Roud, Stamford, CT) буде одслужена панихіда за жертвы концентрацийного лаґру і акциі «Вісла», вчас котрой будут одчытаны назвиска Русинів з Лемковины, што были мучены в Явожні. 

По богослужынях орґанізаторы просят на проєкцию документального фільму про страданя Лемків в 1947 р. «Аж і слезы не старчыли», премєра котрого проходила в квітни/апрілю т.р. в Польщы вчас центральных упамятнінь 70. річниці выгнаня, перше в Рускій Бурсі в Ґорлицях, пак в Collegium Maius Ягайлоньского Університету та на чужыні, в ліґницкым театрі. Проєкция пройде при участи продуцентів фільму – Мариі Сільвестрі і Джона Ріґетіі. 

Про заповід подіі чытаме м.ін.: В 1947 р. новий польскій комуністичний уряд насильні выселил популяцию Карпаторусинів, локальні называных Лемками, з іх рідной землі улокуваной в полудньовій Польщы, на вылюднену обшыр західньой і пілнічной Польщы.