«Lemko Bluegrass Band» концертує в Польщы

Якісий час тому принесли сме вам віст, же ґрупа «Lemko Bluegrass Band» зо Львова выдає свою дебютантску платню (чытайте гев). Што правда, платні іщы неє, зато ансамбль буде мож в найблизшым часі почути нажыво. Кінцьом серпня та початком вересня ЛББ концертувал буде в двох кінчыках Польщы. Перший концерт заграют 22. серпня в Щеціні в рамках фестівалю Стріча Культур (о котрым інформували сме вас гев), а 6. вересня выступлят вчас IV Карпатского Фільмового Фестівалю, орґанізуваного в Тисній (більше про тоту подію чытайте за тым мотузком).

Lemko Bluegrass Band то ґрупа, яка одкликує ся до істориі галицкых еміґрантів (Лемків, Бойків, Гуцулів), котры в минулых столітах выізджали  до Америкы за роботом. Част там осідала, част вертала до старого краю. Там єдны лишали своі мелодиі, а другы привозили зо собом новий музычний досвід, новий музычний баґаж. ЛББ презентує тоту выміну – варияцию карпатской музыкы з музыком Америкы – музыком кантри. Што ім з того выходит? Лемківскє буґі, карпатскій блюґрас, гуцульскій блюс, а ціліст споєна американьскым кантри.