Лемківскы малюванкы для діти

Зима? Єст! Аж і за вікном… Осін? Єст! А в плянах іщы: Яр і Літо. В плянах єст розмалювати кажду част рока. Стоваришыня «Руска Бурса» в Ґорлицях приходит з новом выдавничом серийом – «Малюванкы для діти». Першы дві части уж напечатаны.

«Малюванкы для діти» то зошыты напечатаны з думком о наймолодшых дітях – предшколяках, котры зачынают ся вчыти і познавати світ. То гейбы просты книжочкы до кольоруваня, але были так запроєктуваны, жебы полнити ролю споіня медже забавом а науком. Лучат в собі языковы, культуровы і артистичны елементы.

В каждій з двох части малюванок поміщено фраґменты до кольоруваня і дополняня, але тіж просты вершыкы, римуванкы, співанкы і слова в лемківскым языку. Рисункы представляют характеристичны для лемківской культуры елементы: деревяну хыжу – з зовни, в середині, церков, части народного облечыня ци типовы для реґіону краєвиды. Завдякы тому діти можут не лем розвивати мануальны здібности і креативніст, але тіж познавати своі корені і будувати достоменніст.

Малюванкы цілістю осаджены сут в лемківскым контексті. Примірово, в части Осін поміщено «інструкцию», як мож в легкій і простый спосіб навчыти, в трьох кроках, намалювати церков. Зас в Зимі найдеме сценку вечірок до помалюваня, святого Миколая (але не такого як з реклямы, а такого як найдете на іконах) ци полазників.

Бракує того типу материялів до вчыня – такы проблемы фурт зголошуют учытелькы лемківского языка, зато Стоваришыня «Руска Бурса» в Ґорлицях плянує черговы части малюванок – про яр і літо, а в дальшых плянах сут наступны публикациі, котры збогатят едукацию вчыня лемківского языка серед наймолодшых.

За мериторичный зміст малюванок одповідат Варвара Дуць, учытелька лемківского языка з вельолітнім досвідчыньом, авторка інчой неоціненой публикациі до вчыня – «Робочого зошыту до лемківского языка». Кажда част малюванок має выгідный для діти великій формат А4, чыслит 48 стран, выдрукуваны сут в кольорі.

Вшыткы рисункы запроєктувала ґрафічка і архітектка Домна Цєпляк, яка так само одповідат за цілый ґрафічный і типолоґічный проєкт. Авторка ілюстраций Лемковину знає не лем з лекторату лемківского языка, але головні через роботу над маґістерском працом. Вєдно з Камільом Федериґом запроєктували едукацийну стежку в долині Білой Воды, котра складат ся з шестьох едукацийных павілонів о сучасній формі, інспіруваных архетипом невеличкых хыж, характерных для Шляхтівской Руси (выміры, материял). Каміль запроєктувал іщы візитацийный центр, а Домініка колибу лікуваня болю і травмы.

Авторства Домны Цєпляк сут тіж плякаты трьох лемківскых особности: блянаря, мазяря і дротаря, котры найдете в нашым склепі.