Лемківскы і польскы різдвяны звыкы. Спільне святкуваня і близше познаня

В найблизшых днях в ґорлицкым повіті буде нагода ліпше познати традицийны велийны звыкы. Подія, про котру ниже, буде тым більше цікава, што вєдно своі звыкы будут презентувати Лемкыні і Полькы. Вшытко за справом проєкту, з котрым выступили ґаздыні в Липинках.

Кружок Сельскых Ґаздынь і Ґаздів в Липинках зрыхтувал внесок о дофінансуваня в рамках тзв. малых ґрантів проєкту, котрый має за задачу підтримувати різдвяны звыкы двох культур: лемківской і польской. Ґрант признал Заряд Малопольского Воєвідства. Зато в Липинках в найблизшых трьох днях реалізувана буде задача під назвом «Різдвяны звыкы і обычаі в порівнаню лемківской і польской культур та спільне святкуваня членів кужків сельскых ґаздынь».

Перша зо стріч одбуде ся уж заран, 11. грудня/децембра. Дальшы запоряд 12. і 13. грудня/децембра. Цілю проєкту єст головно взаімне близкє познаня обох культур. Думкодавці мают надію, што через проєкт і пропаґуваня обычаів старшы зможут передавати так лемківскы, як і польскы святочны звыкы молодшым ґенерациям.

В рамках трьох стріч будут ведены мастерскы артистичны варштаты, котры поведут інструкторы. Варштаты будут направлены на як найліпше представляня двох культур, через вказуваня народных звыків. Примірово, участникы проєкту будут ся вчыти варити велийны стравы ци печы різдвяны кісточка.

Ґміна Липинкы то обшыр, котру заселят фурт высокій одсоток лемківской етнічной меншыны. Прото тіж основне, што проєкт направленый єст на представників двох нацийональности – Лемків і Поляків.

Всітри стрічы то нагода на науку і розвиток для членів поєдных кружків сельскых ґаздынь, якы фунґуют в декотрых селах ґорлицкого повіту. Предовшыткым з огляду на пропаґуваня лемківской культуры, запрошыня на подію отримали члены кружків з тых сел, в котрых доднес прожывают Лемкы, заєдно тоты роджены перед 1947 р., як і іх потомны, роджены уж по поворотах з чужыны.

Як мож чытати в анонсі про подію, в стрічы возмут участ очывидно і польскы члены кружків сельскых ґаздынь з обшыри ґміны Липинкы і сусідніх до ней ґмін. Прото будут што найменьше вызнавці трьох конфесий – православной, грекокатолицкой і римокатолицкой.

Разом до проєкту запрошеных єст близко 40 осіб з ріжных сел. Будут то ґаздыні і ґаздове з Липинок, Криґу, Боднаркы, Війтовой, Паґожыны, Загірян, Домініковиц, Кобылянкы, Кунковы, Устя Руского, Смереківця, Шквіртного, Ганчовы, Высовы і Ропы.

Окрем трьох варштатовых стріч, завершыньом проєкту буде спільна велия двох сусідуючых народів. Полякы і Лемкы 14. грудня/децембра сядут вєдно до велийного стола, штобы поколядувати, поділити ся оплатком і просфором та скласти си різдвяны і новорічны желаня.

Вступ на вшыткы акциі є безплатный.