Лемківско-калейдоскопово на 8. Фестівали Калейдоскоп Культур

Як подавали сме пару дни тому на нашым портали, знаний є уж детальнійший проґрам 8. Фестівалю Калейдоскоп Культур во Вроцлаві. Як пишут орґанізаторы на сайті фестівалю, в тым році буде розмаіто-кольорово. В тогорічній едициі рядити будут лемківскы, бойківскы, закарпатскы і гірско-вшелеякы климаты.

В звязку з тым, же тогорічна едиция має в великій мірі тыкати ся лемківскости, мы на порталь лем.фм приносиме Вам деталі звязаны з выступами тых же артистів, котры в своіх репертуарах мают лемківскы пісні і співанкы.

Отже, 12. червця т.р. о 21.00 год., в Фестівальовым Клюбі Старий Кляштор, ул. Пуркінєґо 1, в панели “лемківско і джазово” выступит добрі знана слухачам радия лем.фм СУСАННА. Ден пізнійше, т.є. 13. червця, в тым самым місци о 22.30 год., в панели “Лемківско-жыдівскє афтерпарти” свій выступ даст ґрупа Дулярьовы Братя (The Dollars Brothers), але тіж молодіжна ґрупа лемківскых студентів ПРИПАДОК, котры окрем лемківскых творів, выконуют тіж пісні вшелеяко-славяньскы.

За тым мотузком можете пізрити на деталі звязаны з концертом СУСАННЫ, а гев дознати ся пару інформаций про Дуляровых Братів (Тhe Dollars Brothers) і ПРИПАДОК.