Лемківско-грецкы танці і співаня в Рускій Бурсі

В середу 23. липця, ансамбль Руской Бурсы Терочка гостил в себе, значыт в Рускій Бурсі, вынятковых гости. До Ґорлиц приіхали з візитом участникы 22. Медженародовoгo Фестівалю Діточых Реґіональных Ансамблів – Свято Діти Гір. Были то лемківскы ансамблі Кычерка і Сонечка та специяльний гіст – ансамбль Пирсос з Грециі.

Вшыткы пристутны (в сумі 100 осіб!) напочаток выслухали пару слів з істориі Лемків та істориі Руской Бурсы. Пак гості оповіли кус о собі, а потім пришол час на спільне співаня, гуляня, малюваня, а і малий почастунок. Терочкіны Зозулі (сл. і музыка Петро Мурянка) выспівували з Терочком єдным голосом і Грекы і мали артисты з Кычеркы і Сонечок.

Стріча мала на ціли інтеґрацию і познаня ся діти і молодежы, зато спільне співаня лемківскых пісен переплітане было науком грецкых традицийных танців, якы вшыткым присутным ся любили. А молодым танцюристам з Грециі барз сподабало ся гуляня на наш спосіб – в парах і з великом охотом просили лемківскы дівчата до танця. На памятку каждий ансамбль намалювал образок з видом того, з чым ся ансамбль ідентифікує. До пообзераня в Рускій Бурсі. 

Спільным забавам і танцям не было кінця…
Бодай лем мале “кус” того, што ся діяло, можете перезріти на знимках.