Лемківскій пікнік в ЗША

Конец яри і початок літа то найліпший момент, жебы на добре зачати вакацийний період, а кєд урльопы плянуєте дакус пізнійше, можете почути тот климат через ріжны стрічы на свіжым повітри – ґрілюваня і пікнікуваня, т.є веселіня ся з родином, близкыма і приятелями найліпше зачати уж тепер. Спосеред великых пікніків, о котрых заявляли сме в текучым сезоні, єден уж за нами – в минулу суботу, 18. червця/юнія, одсвяткували сме в Ґорлицях 25-літя реактивациі Общества Руска Бурса і 5-літя діючого при ним радия лем.фм. В найблизшым часі, спосеред акций, котры будут проходити під голым небом, можете выбрати тіж собітковы подіі: ярмак в Вислоку Нижнім (25.06), або реактивацию паліня собіткового огня в Ґладышові при Лемківскій Едукацийній Загороді (2.07). Інформуєме на нашым портали о дальшых літніх акциях, але типово пікнікову атмосферу буде мож найти онедогла за великом водом.

Уж наступний рік в околицях даты Русаль-Зеленых Свят (за юлияньскым календарьом) в Зъєднаных Штатах Америкы єст орґанізуваний лемківскій пікнік, на котрий орґанізаторы просят так: може буде злива, ачий сонце, берте родину, возте тіж приятелів! Каждого красні просиме! Тота – циклична уж – подія одбуде ся в Гартсдейль (Ridge Road Park Pavillion #2, 287 Ridge Road, Hartsdale NY 10530). На місци найдете напиткы і ідло ріжного рода, але напевно, хоц в приємным товаристві вшытко добрі смакує, найліпше Вам ся будут любити лемківска кобаса і капустичка.

Зато уж тепер резервуйте сой свобідне недільне пополудне 26. червця/юнія 2016 р., жебы прити до парку коло Гартсдейль, котрий находит ся лем парудестят кілометрів од Ню Йорку – гайвейом буде найскорше!

За орґанізацийныма інформациями позерайте долов.