Лемківскій на остаток матурального маратону

З початком мая в Польщы традицийно проходят матуральны еґзаміны, якы сут завершыньом середньой школы. Про здаючых тогорічный еґзамін не лем сама матура може выкликувати стрес. Тырват загальнопольскій страйк учытелів, а в звязку з тым з ріжных стран чути ріжны голосы тыкаючы орґанізациі еґзаміну дозрілости в маю. Надієме ся, што того рока пройде і дальша – сема уж матура з лемківского языка.

Матуры як каждый рік зачнут ся од іспытів з трьох основных предметів. Внет по долгым майовым вікенді, 6. мая пройде еґзамін з польского языка, а пак математикы, якій што рока выкликує вельо страху серед матуристів, і 8. мая здаваный буде чужый язык (найчастійше є то анґлицкій або німецкій). Окрем реченых предметів матуристы годны сут здавати дальшы еґзаміны з выбраных скорше наук. Так найчастійше будут то фізика, хімія, біолоґія, істория ци знаня о соспільстві. Каждый з предметів ученикы можут здавати так на основным рівни, як і в розшыриню.

Центральна Еґзамінацийна Комісия, згідно з польскым законодавством, дає можніст писати матуры з меншыновых і реґіональных языків. Традицийно, тогорічны еґзаміны з меншыновых языків заплянувано на послідній ден матурального маратону – значыт на 23 мая. Од 9.00 год. проходити будут еґзаміны на основным рівни, а од 14.00 год. буде мож здавати еґзаміны на розшыреным рівни.

В тот же ден до еґзаміну з лемківского языка годны будут приступити дальшы ученикы. Найчастійше сут то особы, якы ходили на лекциі лемківского в шкільных і позашкільных пунктах вчыня. До той поры все находили ся очохы мати на матуральным свідоцтві записаный лемківскій язык. Были то ученикы середніх шкіл в Ґорлицях, Ліцею в Ліґници і Ґлоґові. Окрем языків нацийональных і етнічных меншын в тот ден мож здавати і кашебскій язык, якій в Польщы має статус реґіонального языка. Медже 9. і 22. мая 2019 р. в поєдных школах здаваны будут еґзаміны з языків в бесідуваній формі. Така можніст є тіж про лемківскій.

Перша матура з лемківского здавана была в Ліґници в 2013 р. Надієме ся, што того рока до ґрупы тых, якы рішыли здавати еґзамін з лемківского языка, долучат новы матуристы. Результаты проголошены будут в липци/юлию.