Лемківскій файтер К1 Давид Свєрчыньскій – на ґали в Варшаві

Давид Свєрчыньскій, лемківскій файтер родом з Крениці, днес, т.є. 23. квітня/апріля 2016 р., стане до бою в катеґориі К1 до 81 кґ на семій едициі варшавской ґалі ДСФ Кікбоксінґ Челендж (DSF Kickboxing Challenge).

Як бесідує портальови dsfchallenge.com Давид Свєрчыньскій, репрезентуючий клюб Fight House 27 Nowy Sącz: Мій противник то барз добрий заводник. Виділ єм його попередні боі на DSF. […] Єдно знам напевно – буде ся борол докінця. Против ньому на рінґ выйде Якуб Бартнік з підваршавского клюбу X Fight Piaseczno. Ґаля ДСФ Кікбоксінґ Челендж #7 одбуде ся 23. квітня/апріля 2016 р. в Спортовій Гали при ул. Оборонців Тобруку 40 на варшавскым Бемові. Білеты мож достати через інтернетовий систем ebilet.pl.

27-літній файтер зачынал кікбоксерску карєру од формул ляйт і фуль-контакт, здобываючы медалі в Чемпіонаті Польщы. В 2014 р. в Бардийові выграл бій о пояс Медженародового Чемпіона Словациі, а вернувшы на бардиівскій рінґ в 2015  р., повторил тот успіх. На рінґу все выступує в шортах, прикрашеных русиньскым гербом – карпатскым медведьом.

10. листопада/новембра 2014 р., два дни по выграным бою о пояс Медженародового Чемпіона Словациі, бесідували сме нажыво з Давидом Свєрчынскым в радию лем.фм. Запис того інтервю мож одслухати пониже.