Лемківскій фанк-фольк, значыт концерт ансамблю „Дуляровы Братя”!

Уж третій раз на краківскым Казімєжу вызвучат мелодиі лемківскых народных співанок заграных в сучасній а і неповторній обробці. На концерт просит ансамбль Дуляровы Братя з Ґорлиц. Концерт одбуде ся 17. січня о 20.30 год. в клюбі Артефакт (ул. Дайвур 3) в Кракові.

Дуляровы Братя грают од 2006 рока, інспіруют ся лемківском музыком, але грают єй так, як іщы нихто ся не одважыл – лемківскій фольклор облікают в енерґетычны попово-роковы звукы з міцныма елементами діско і фанк. Грают тіж авторскы лемківскы кавальчыкы. Пісню о здеґустуваным споляченыма західняками Василю подібно заборонили ім уж грати на Заході… Але фурт можете єй почути в радию ЛЕМ.FM.