Лемківскій Триптих Яцка Косібы

Ґорлицкій фотоґраф Яцек Косіба ходил по Лемковині і знимал своім фотоапаратом тото, чого уж в днешніх часах не досвідчыме. Записал на клішах давне лемківскє село, люди, а при тым звыкы і народну культуру.

Творчіст фотоґрафа Косібы буде мож внет видіти в Бортным. 8. липця/юлия пройде вернісаж выставы пн. Лемківскій Триптих, яка вкаже богатство материяльной і духовой культуры Лемків.

Весіля, весіля…

Може лемківскій обзерач не чул наштоден за вельо о Яцку Косібі. Старшы быти може знают (а при тым памятают), што Косіба сфотоґрафувал єдно з цікавшых лемківскых весіль, коли то Лемкы вернули з выгнаня і явно зачали одроджувати свою культуру. Было то весіля Анны Пелехач і Петра Трохановского (Мурянкы).

Косіба записал на фотоґрафіях не лем присутных на весілю, в тым тузів лемківской культуры (м.ін. видочных на головній фотоґрафіі на залученым плякаті Ярослава Трохановского, Федора Ґоча – весільного старосту, а тіж Павла Стефановского), але предовшыткым традицийный обряд нашого весіля. Окрем того увічнил – здає ся, іщы товды незмінену – простір Лемковины: Білянкы (одкале выберал ся Пан Молодый), Вірхні (одкале выходила Молодиця) і Ждыні (де было вінчаня).

Нестрічаным днес образом єст хоц бы типова лемківска капеля – ту як раз видиме, што окрем спомненых заслуженых лемківскых діячів склад капелі творили зындранівскы Циґаны. Як писал Іван Русенко – одвічны приятелі Лемків.

Само весіля, з котрого знимкы будут творити част Лемківского Триптиху, было тіж скамеруване трійком товдышніх польскых студентів – членів Студентского Кружка Бескідскых Провідників з Люблина. Даякы знимкы Яцка Косібы сут як раз схоснуваны в фільмі.

Выстава буде презентувана до кінця серпня/авґуста в просторах грекокатолицкой церкви св. Космы і Даміана в Бортным, яка тепер є музейным обєктом Музею Дворы Карвациянів і Ґладышів в Ґорлицях.

Яцек Косіба

Автор вродил ся в 1944 р. в Стружівці при Ґорлицях. З фотоґрафуваньом звязаный є од близко 70 років (зачал ся ньом занимати од 1956 р.). В 1965 р. скінчыл курс специялистів фотоляборантів. Управніня інструктора фотоґрафіі отримал од Міністра Культуры і Штукы в 1978 році.

Перше, в 1963 р. остал членом Ґорлицкого Фотоґрафічного Товариства. Початково фотоґрафувал головно «до шуфляды». В 2008 р. в Містецкій Публичній Бібліотеці в Ґорлицях вказал свою выставу Порівнаня. Дотепер вказал парунадцет темовых індивідуальных выстав та пару ґруповых. Част з них тыкала уж красы Лемковины і єй простору.

Отримувал выріжніня і нагороды в реґіональных і загальнопольскых конкурсах. Фотоґрафує бывше і теперішнє ґорлицкой землі, в тым вельо звязаного з Лемками і Лемковином.