Лемківска Загорода 2016 – хто охочий?

Того рока уж третій раз буде мож задармо провести част вакацийного часу і взяти участ в таборі Стоваришыня Руска Бурса пн. Як жыли нашы предкы?, якій буде проходил традицийні в Лемківскій Едукацийній Загороді в Ґладышові.

Табір буде проходил в днях 13.-18. липця 2016 р. в під оком квалифікуваных інструкторів і опікунів: Дануты і Ваня Дзюбинів та Варвары Дуць.

Вчас табору ведены будут варштаты традицийного ремесла і лемківскых звыків. В проґрамі варштатів находят ся:

• ґаздівскы роботы: кошыня, молочыня, молотя зерна,
• традицийне ремесло: робліня ґонтів, кычок, лыжок,
• обрабляня лену, волны, пряджыня, тканя полотна,
• робліня мотузів,
• лемківскє ідло: печыня хліба, вырабляня масла, огріваня сыра, варіня страв.

Додатково, буде наука лемківской бесіды, істориі, звыків, співу. Буде тіж змога походити по околици, звидіти церкви, посідити і поспівати при ватрі. Занятя ведены будут по лемківскы.

Табір єст цілком дармовий. Орґанізаторы забезпечают спаня, выжывліня, опіку та вшыткы варштаты. Участникы прошены сут о доіханя на свій кошт.

Знимкы з І і ІІ табора мож обізрити на нашым сайті за тым і за тым мотузком.