«Лемківска Одисея» – глядают акторів

Ґорлицкій Центр Культуры задумал зробити спектакль присвяченый Лемкам і про Лемків. Хоче, жебы і Лемкы взяли участ в варштатах, котрых результатом буде вказаня пєсы, а тоту зрыхтує професийный театральный режысер – Войцєх Фаруґа.

Горячо просиме на варштаты вшыткых, котры мают од 30 до 65 років – бесідує Барбара Фуґєль з Ґорлицкого Центра Культуры. Варштаты вести будут професийоналисты. Запросили сме Войцєха Фаруґу, якій приде з двома асистентами, Якубом Кручком та Катажыном Павловском – додає.

Варштаты ведены будут згідні з ідейом community theatre. Є то анґлицкій модель театру локальной соспільности. Твореный є на основі істориі членів даной ґрупы з особливым значыньом. Ґорлицкій Центр Культуры хоче задумати ся над лемківском історийом і культуром. Барз нам залежыт, жебы передовшыткым Лемкы взяли участ в варштатах – бесідує Б. Фуґєль. Вчас варштатів будеме разом з акторами-аматорами зберати важны для Вашой соспільности істориі і спомины та на основі того зробиме спектакль. Цілю community theatre є інтеґруваня, єднаня соспільности та представліня важных для даной ґрупы подій, через котры тота ґрупа ся дефініює.

Хто хоче взяти участ в варштатах, просиме жебы ся до нас зголосил. Варштаты будут тырвати через тыжден од 2. червця 2019 р. Закінчены будут показом штукы – інформує Б. Фуґєль. Будеме хотіти вказаты пєсу і в сусідніх містах – в Яслі, Коросні. Запрашаме! – заохочує.

Інформациі і записы:
odysejalemkowska@gmail.com
Ґорлицкій Центр Культуры:
Барбара Фуґєль 516 536 761
Катажына Павловска 511 124 047