Уж не раз ріжны нашы запаленці мрияли о тым, жебы колиси і Лемкы мали свою футбольову команду. Хоц аматорска, але яка-така ся основала. А при тым ціль был важный – лемківска команда заграла в благодійным турніры.
Вшытко діяло ся в суботу, 27. квітня/апріля на боіску пшемківского клюбу «Замет». Ініциятива благодійного турніру вышла од Охотничой Протиогньовой Стражы в Пшемкові. Была то уж VII едиция змагань, але перша, в котрій взяла участ лемківска команда.
Турнір был зорґанізуваный пшемківскыма стражаками для помочы для Каєтана – сына єдного з пшемківскых пожарників. В сумі заграло 10 команд. Лемківска – репрезентувала село Михалів, в котрым так само діє Охотнича Протиогньова Страж. То село знане вшыткым Лемкам – каждого рока проходит гын Лемківска Ватра на Чужыні.
Турнір одкрыл товарискій меч молодіжных пожарничых команд з Пшемкова і Пархова. Присутный был бургомайстер Пшемкова, Єжы Щупак, якій подію обнял своім патронатом.
Наша лемківска команда рахувала 9 футболистів, были то: Андрий Басалыґа, Павльо Басалыґа, Патрик Лучковец, Андрий Кайфаш, Богдан Копча, Яков Прибыла, Юрко Шпытко, Михал Ґожыньскій і Севериян Косовскій.
Команда мала зрыхтуване специяльні на тоту подію облечыня, на котрым находили ся нашы нацийональны символы, в тым м.ін. русиньскій ерб і знане лоґо з просписовой кампаніі «Сме Лемкы».
Завдякы змаганям і партнерскій грі ріжных команд, повело ся зобрати шумну суму грошів (більше як 21 тис. зл) для потреб малого Каєтана.
Повязаны дописы
Ґорлиці 106,6 MHz
