Лемківска філолоґія – днес зачынат науку наступний річник студентів

Днес зачынат ся академіцкій рік 2014/2015. До наукы по вакацийній перерві вертают студенты, але деякы з них допіро зачынают академіцкє жытя. Посеред них сут тогорічны матуристы, котры выбрали лемківскій язык, як єден з матуральных предметів.

1. жолтня 2014 р. то тіж початок наукы для шестеро студентів лемківской філолоґіі на Педаґоґічным Університеті в Кракові, котры выбрали двонапрямовий профіль, ведений при росийскій філолоґіі. Росийска філолоґія з русиньско-лемківскым языком (бо так зове ся тот напрям студий) ведена єст на краківскым ПУ од 2001 рока. Основательком і од самого початку єй головным мотором єст др габ. Олена Дуць-Файфер, дослідничка лемківского языка, літературы і культуры, окрем того діячка в лемківскых орґанізациях і поетеса.

Двойний росийскій і лемківскій профіль студий то нагода до пошыріня знаня з обшыри двох языковых культур, што дає абсольвентам більшы шансы на рынку працы, але і можніст участи в вельох выіздах, проєктах і стипендиях (напр. для найліпшого лемкознавці) та імпрезах і подіях з русиньского культурного жытя.

В 2013 р. таємна до днес ґрупа 9 орґанізаций (звіданы, стыдают ся до того признати, сут в тым – за нашым знаньом – украіньскы, лемківскы(?) і церковны) поперла внесок Штефана Гладика, бывшого уж члена Спільной Комісиі Уряду та Нацийональных і Етнічных Меншын, о однятя міністерияльного дофінансуваня на лемківску філолоґію, хотячы передати тоты фонды м.ін. на церковны цілі, доцяп не розуміючы, же специфіка того меншынового напряму не дає змогы конкурувати з подібныма філолоґіями “великых” языків на едукацийным рынку. О справі писали сме початком того рока (за мотузком).

Щестьом, на Педаґоґічным Університеті в Кракові дальше ведена буде лемківска специяльніст, котрой абсольвенты і студенты то уж днес учытелі, тлумачы, журналісты, радийовы редакторы і лідеры лемківскых орґанізаций.