Лайчак бы мав быти председом Валной громады ОЗН

Словацькый діпломат і сучасный міністер загранічных діл Словацькой републікы, котрый має русиньске походжіня, бы ся мав стати председом 72-го засіданя Валной громады Орґанізації зъєдиненых народів (ОЗН). Свою номінацію на протокларно найвысшу функцію в рамках міджінародной орґанізації оголосив Лайчак по вчерашнім засіданю влады Словацькой републікы.

Словакія є єдиным кандідатом в рамках Выходоевропской реґіоналной ґрупы (ВЕРҐ) в ОЗН, котрій за прінціпом реґіоналной ротації приналежыть тота функція. ВЕРҐ потвердила номінацію Лайчака в ночі з віторка на середу 30-го новембра 2016-го року. Дефінітівно бы мав быти на посаді потвердженый голосованьом на Валній громаді в юнію 2017-го рока. Як Лайчак оголосив, єдночасно з тым бы зістав і словацькым міністром загранічных діл. В тій кандідатурі має підпору премєра Роберта Фіца і словацького презіднта Андрея Кіскы. Є єдиным кандідатом обще.

Пан Кі-муна не вычеряв

Лайчак быв того року словацькым кандідатом і на функцію ґенералного секретаря Орґанізації зъєдиненых народів, і мав амбіції у функції вычеряти Пан Кі-муна. Кандідатура Лайчака выходила із того, же головне кресло ОЗН мала обсадити Выходоевропска реґіонална ґрупа 23-ох держав, міджі котры належыть і Словакія. Лайчак ся многым видів як найреалнішый кандідат. Підпору мав і у Словацького премєра Роберта Фіца, котрый собі го сам выбрав за кандідата. Но як раз Фіца многы обвинюють з того, же Лайчак голосованя односно функції секретаря ОЗН наконець не выграв.

Хоць владна коалічна партія SMER-SD премєра Роберта Фіца декларує ся як соціално-демократічна партія, премєр Фіцо головно од часів біженецькой крізы в Европі хоснує невыбераный словник, котрый многы оцінюють як націоналістічный і популістічный. Тото спостерігали політіци і журналісты і за граніцями Словакії. PES – Партія евроскых соціалістів докінця погрозила Фіцовій партії позаставліньом членства меджі европскыма соціалістами.

Як раз Фіцовы высловы о біженецькых квотах, моніторованю каждого єдного мусулмана на Словакії ці забеспечіня, жебы на Словакії не выникла уцілена мусулманьска комуніта, были за поглядами журналістів проблемом Лайчака, котрый не знав однести ся ку тым справам ани перед ОЗН ани перед загранічныма журналістами. Його одповіді несли ся в „діпломатічнім“ духу, же він то не повів, і на тоты вопросы треба ся звідати премєра Фіца. Беспечностна рада ОЗН наконець за нового ґенералного секретаря выбрала Антонія Ґутереса, довгорічного портуґалского політіка і діпломата.

Кавза і фунцкія

Хоць міністер Лайчак кандідовав в остатніх парламентных выборах на списку Фіцовой соціално-демократічной партії SMER-SD, кандідовав як непартійный і быв все позітівно сприниманый майже цілым політічным спектром на Словакії як успішный і фаховый діпломат. Популарность мав і міджі лудми без огляду на їх політічны преференції. Навеце ся з міністром Лайчаком ниґда не звязовала жадна кавза.

Можливость здобыти высоку міджінародну функцію приходить як раз в часі, коли має міністер домашній проблем.

Бывша робітничка резорту діпломації Зузана Главкова перед дакілько днями вєдно із орґанізаційов Transparency International Slovakia зробила пресконференцію, на котрій пояснила, же з міністерства по дакілько місяцях одышла із причіны, же виділа нетранспарентне і продражене господаріня міністерства повязане із председництвом Словакії в Раді Европской унії. Міністерство мало за рецепцію ку презентованю лоґа председництва і за одкрываючій концерт словацького председництва заплатити омного веце, як было плановано. На концерт мало быти плановано 20 тісяч евр, наконець стояв веце як 200 тісяч евр. Міністерство притім мало обыйти закон о публічнім обстараваню і забеспечіти так, жебы на тых подіях заробили фірмы близкы партії SMER-SD. Главковой слова потвердив і далшый бывшый робітник міністерства, їй колеґа, котрый так само одышов із резорту Павол Салай.

Міністер Лайчак дотеперь не публіковав матеріалы повязаны з кавзов, котры од нього жадають журналісты, но єдночасно не припущать обвиніня Главковой і говорить, же міністерство нич не порушыло. На вопрос словацького журналісты Браніслава Заводьского, ці Главкова циґанить, не знав одповісти. Премєр Фіцо в повязаню з кавзов заатаковав журналістів на пресконференції, кідь повів, же дакотры із них суть „брыдкы протисловацькы простітуткы,“ чім собі выслужыв завдякы аґентурі Reuters публіціту по цілім сівіті. Лайчак быв знова тихо, хоць сидів коло Фіца. І так ани днесь новій кандідатурі Лайчака Фіцо не помагать.

Мірослав Лайчак

Народив ся 20-го марца 1963 р. в Попраді і має походжіня в русиньскім селі Орябина. Веце жрідел пише, же є словацькым діпломатом русиньского походжіня, хоць сам то ниґда публічно не повів, нарозділ од сучасного міністра Роберта Калиняка, ці бывшого міністра Івана Міклоша.

В діпломації зачінав у 1988 р. на федералнім міністерстві в Празі. Першу діпломатічну місію мав у Москві. У 1994 р. быв выменованый за словацького амбасадора в Японії. В рр. 1999 аж 2001 робив як окремый асістент выняткового уповномоченого ґенералного секретаря ОЗН про Балкан. У 2001 р. дістав ся знова до функції амбасадора до Белеграду і вєдно з тым мав в аґенді і Албанію а Македонію. В роках 2005 – 2007 быв ґенералным директором про політічны справы міністерства загранічных діл і єдночасно в службах Европской унії в 2006 р. помагав з приготовліньом референдума о незалежности Чорной Горы. На Балкані зістав діяти і в роках 2007 – 2009, кідь там быв як вынятковый представитель Европской уніїї про Босну і Герцеґовину.

Першыраз як непартійный став ся міністром загранічных діл во владі Роберта Фіца в році 2009. По навернутю партії Роберта Фіца ку владі у 2012-ім році ся і Лайчак знова став міністром заграніча, котрым зістав і в сучасній третій владі Роберта Фіца.

Жрідло фотоґрафії: Reuters.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА