Лавреатом юбілейного Духновічового Пряшова став Кевін Выравець

В понедільок 10-го юна 2019-го року Велика сцена Театру Александра Духновіча привітала юбілейный 20-ый річник цілословацького конкурзу в декламації русиньской поезії, прозы, властной тврчости і малых сценічных форм Духновічів Пряшів 2019.

Цілословацьку русиньску переглядку декламаторів традічно опередили окресны або реґіоналны конкурзы, до котрых і тот залучіли ся стовкы дітей. На змаганя в Пряшові поступили тот рік лем тоты найліпшы, значіть декламаторы, котры скінчіли в окреснім конкурзі у своїй катеґорії на першім місці. На сцені нашого професіоналного театру ся так замагало 65 участных, з них дакілько было такых, котры ся вказали в двох жанровых катеґоріях.

На юбілей оцінены писателі і педаґоґове

Духовнічів Пряшів тот рік написав уж свій 20-ый річник. Юбілейне змаганя одкрыв своїм приговором председа Русиньской оброды на Словеньску, головного орґанізатора конкурзу, Мартін Караш. По нім приговорила ся участным і Анна Кузмякова, котра тоту днесь вже традічну подію перед двадцятьома роками засновала.

Кедьже тот рік святковав ся юбілей шторічного праздника русиньского літературного слова, орґанізаторы вырішыли, же ся в першій части проґраму уділять дяковны грамоты писателям і педаґоґам, котры при Духновічовім Пряшові стояли од початку. Дяковныма грамотами были оцінены писателі Йосиф Кудзей, Миколай Ксеняк, Штефан Смолей і Штефан Сухый. Із педаґоґів собі грамоту перевзяли Марія Ґоцова, Івета Мелничакова і Власта Мороховічова.

Лавреатом став Кевін Выравець

По святочнім одкрытю вже зачала конкурзна часть проґраму. Порота в складі Маріян Марко – директор Театру Александра Духновіча (ТАД) як председа, Іґор Латта – довгорічный член драматічного колектіву ТАД, Йосиф Пантликаш – член драматічного колектіву ТАД, Анна Кузмякова – основателька конкурзу, і Петро Медвідь, выслухала участных в шестьох віковых катеґоріях, котры были іщі поділены на жанры – поезія, проза, властна творчость, духовна декламація, народне розповіданя і малы сценічны формы.

Окрім оціньованя окремых віковых і жанровых катеґорій порота мусила вырішыти і о цілковім переможцьови 20-го річника Духновічового Пряшова, як і о участникови, котрый здобуде Ціну Матиці словацькой.

На основі рішіня пятьчленой пороты тот рік Ціну Матиці словацькой здобыла Лавра Фузеріова із Основной школы Коменьского у Свіднику, котра декламовала в 3-ій віковій катеґорії прозу. Цілковым переможцьом юбілейного конкурзу Духновічів Пряшів, значіть лавреатом, став Кевін Выравець, з той самой школы. Лавреат выступав у третій віковій катеґорії з властнов творчостьов. Тогорічный лавреат сповньовав єдно із головных условій, же брав участь на Духновічовім Пряшові вже вецераз і порота може видіти як з рока на рік його умелецька декламація зліпшує ся.

Подяка педаґоґам

Про дітей і тот рік быв приготовленый забавный проґрам, котрым собі скоротили час, покля порота рішыла о резултатах конкурзу. Тот приготовили акторы Театру Александра Духновіча в Пряшові Зденка Кваскова, котра была і конференцьєрков святочной части одкрытя конкурзу, і Івета Фейкова.

Велика подяка і тот рік належыть педаґоґам, котры приготовлюють велике множество дітей на русиньскый конкурз в декламації, кедьже і реґіоналны конкурзы суть наповнены, наперек тому, же лем на малім чіслі школ учіть ся русиньскый язык.

Духновічів Пряшів 2019 з публічных жрідел підпорив Фонд на підпору културы народностных меншын, а так само і Окресный уряд в Пряшові – Одбор школства.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА