Лавреатом ціны ПСК тот рік і Юрій Штеньо

В понедільок 17-го октобра 2022-го року проходило 40-те засіданя заступительства Пряшівского самосправного краю (ПСК). Депутаты зышли ся на остатнім засіданю в такім складі крайского парламенту, кедьже Словакію чекають крайскы і комуналны выборы.

На проґрамі засіданя было аж 35 пунктів. Окрім іншого вырішовало ся о лавреатах Ціны Пряшівского самосправного краю за 2022-ый рік. Меджі лавреатами є і русиньскый неврохірурґ Юрій Штеньо.

Трьоми лавреаты

На Ціну ПСК, котра ся вже буде передавати 18-ый раз, можуть номінації посылати як пріватны особы, так і орґанізації. Тот рік пришло 16 номінацій, з того вшыткы условії на номінацію сповняло 15.

На засіданю крайского парламенту пряшівскы депутаты вырішыли, же трьома лавреатами тогорічной Ціны ПСК стануть умелецькый скулптор Ян Лесняк, камераман і режісер Ладіслав Чікі in memoriam, і вызначный русиньскый неврохірурґ Юрій Штеньо. Штеня на ціну ПСК номіновав віцежупан Мартін Якубов.

Ціну дістане за вынятковы довгорічны заслугы і вызначный фаховый вклад до розвитку неврохірурґії на Словакії і в загранічу.

Ладіслав Чікі, котрый вмер лем тот рік по довшій хвороті, так само є знамый Русинам на Словакії, бо десяткы років окрім іншого приготовльовав у Словацькій телевізії, пак в Радію і телевізії Словакії Русиньскый маґазін.

Юрій Штеньо

Проф. МуДр. Юрій Штеньо, Др. н. (р. 1948) є родаком з русиньского села Кленова, Сниньского окресу. Є цілосвітово познатым і узнаваным неврохірурґом. Ціле жытя присвятив тій дісціпліні як лікарь і науковый робітник.

У своїй довгій карьєрі го можеме знати і на вызначных посадах – як декана Лікарьской факулты Універзіты Коменьского в Братіславі ці довгорічного предносту Неврохірурґічной клінікы Лікарьской факулты Універзіты Коменьского. Выпрацовав методу мапованя нервовых драг електрічнов стімулаційов почас мікрохірурґічных операцій мозґу. Выпрацовав і класіфікацію туморів мозґу, котра є цілосвітово прията. Є автором дакілько сто фаховых публікацій і дакілько сто лекцій по цілім світі.

В році 2007 Юрія Штеня презідент Словацькой републікы Іван Ґашпаровіч нагородив Прибиновым крестом І. класы за розвиток неврохірурґії.

Як єдному із найвызначнішых фаховців у области неврохірурґії, деканови Лікарьской факулты і бывшому предностови Неврохірурґічной клінікы му было у 2018-ім році уділене оцініня Кріштальове крыло.

Быв оціненый і Честным узнаньом Сівтовой федерації неврохірурґічных обществ за розвиток неврохірурґії на благо людства. У 2015-ім році быв зарахованый меджі 16 найвызначнішых неврохірурґів на світі.

Найвысшы крайскы оцініня ПСК ся будуть лавреатам передавати в рамках ґалапроґраму в децембрі на Великій сцені Театру Йонаша Заборьского в Пряшові.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА