Лавреатом літературного конкурзу став Міро Жолобаніч

У віторок 30-го марца 2021-го року проходило выголошіня найліпшых творів загнаных до семого річника Літературного конкурзу Марії Мальцовской. Тогорічным лавреатом став Міро Жолобаніч.

Выгололішіня переможців, але і прочітаня вшыткых загнаных творів, тот рік проходило онлайн в службі Youtube, кедьже пандемічна сітуація не доволює орґанізовати події. Онлайн подійов проводила Кветослава Копорова, предсидателька Сполку русиньскых писателів Словеньска. Якраз тот орґанізує літературный конкурз вєдно із Академійов русиньской културы в Словацькій републіці і Інштітутом русиньского языка і културы Пряшівской універзіты.

До конкурзу в тім річнику загнало свої творы десять авторів, з того єден новый. Реґіонално была участь поділена так, же з окресу Стара Любовня были двоми авторы, з окресів Свідник і Строків загнали свої творы трьоми, з Меджілабірського окресу так само трьоми авторы, а двоми писателі были в конкурзі за окрес Снина.

На третім місці скінчіла тот рік Людмила Шандалова із свойов прозов про діти. Друге місце здобыв Юрко Харитун, котрый до конкурзу традічно загнав стихы. Лавреатом семого річника Літературного конкурзу Марії Мальцовской став Міро Жолобаніч із гуморесками.

Міро Жолобаніч ся народив 13-го юна 1956-го року, молоды рокы пережыв у Пчолинім, Сниньского окресу. Ґімназію закінчів у Снині, пак продовжовав штудії на Філозофічній факулті Універзіты Павла Йозефа Шафарика в Пряшові. Робив высокошкольского педаґоґа, але і педаґоґа про арештантів. Моментално є у выслуговій пензії. Жыє в Кошыцях.

Дотеперь му по русиньскы вышли три книжкы афорізмів доповненых карікатурами: Хто ся сміє, є одважный із 2017-го року, Хто ся сміє, є мудрый із 2018-го і книжка Хто ся сміє, є здравый, яка вышла в році 2019.

Літературны творы оціньовала тричленна порота. Вітязны творы будуть публікованы в часописі Русин.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА