Лабова в конкурсі

Тырват четверта едиция літературного конкурсу о Нагороду ім. о. проф. Болеслава Кумора за 2015 рік, орґанізуваного Сандецком Фундацийом. Нагорода признавана єст в двох катеґориях: Книжка о сандецкій земли і Сандескій автор. На выграных ждут памтятковы статуі і грошовы нагороды з пулі 20 тис. зл.

Єдном з позиций, яка стартує в конкурсі, єст книжка авторства Целіны Цемпы пн. Лабівскы Ескізы. То збірка оповідань о Лабовій, селі якє до ІI Світовой Войны такой цілістю заселене было Лемками. По выселінях місце Лемків заняли приіздны. В книжці мож дознати ся головні про польскых жытелів ґміны Лабова. Перший розділ посвячений єст Полякам на обшыри ґміны Лабова в австрийскых роках, пак авторка описує подіі тых, котры трафили на примусовы роботы до Німец. Окремий розділ посвячений єст траґічній істориі жыдівской родины Фрейів з Лабовы, яка мала корчму при лабівскым рынку, та сутиациі Лабовы в переддни початку ІІ Світовой Войны. Авторка помістила тіж інформациі о цмонтерях ґміны Лабова, при нагоді представляючы сыльветкы важных лемківскых личности, як напр. похованого в Новій Веси владыкы Василя Масцюха, першого Апостольского Адміністратора Лемковины. Книжка выдана єст в польскым языку, выдавцьом єст Товариство Любительів Лабівской Землі.

В бібліотеці Руской Бурсы находит ся примірник той книжкы, даруваний авторком – Целіном Цемпом, книжка доступна єст до вычожычыня.

Нагорода ім. о. проф. Кумора має задачу выріжнити найважнійшы творы, котры піднимают темы звязаны з сандецком земльом і єй жытелями та авторів, якы выводят ся з того реґіону. Реґулямін не ограничат формы і літературных жанрів. Серед зголошаных в попередніх едициях побуликациях сут м.ін. річникы, памятникы, альбомы зо знимками, літературны творы, поезия, словникы, а і комікс. Нагорода признавана єст каждий рік. Реґулямін найдете за тым мотузком. Творы мож высылати іщы до 15. лютого/фебруара т.р.