Лабова – русиньскє село, жыдівскій штетль і польска колонія (ІI част) – середа, 20.00 год.

Соспільна орґанізация Сандецкій Штетль, яка намагат ся сохранити памят про минуле сандецкой землі, 21. мая т.р. зорґанізувала в Лабовій ІІІ Історичне Корзо. Напомічны в познаваню многонацийонального минулого сандецкой землі были Целина Цемпа, учытелька польского языка, авторка моноґрафій села Лабова і предсідателька Товариства Любителів Лабівской Землі, та Лука Поломскій з Сандецкого Штетля.

В другій части реляциі познаме за топоґрафічным порядком лабівскій кіркут – жыдівскій теметів. Потім перейдеме до грекокатолицкой церкви де познаме всокочены лемківскы памяткы. На конец зыйдеме зас до рынку де наше лабівскє корзуваня закінчыт.

До выселіня в 1947 р. Лабова мала право орґанізувати 9 ярмаків до рока. В селі находит ся грекокатолицка мурувана церков Покровы Пресвятой Богородиці з 1784 р., римокатолицкій костел св. Станіслава і жыдівскій теметів з сохраненыма старыма мацевами. В Лабовій тіж вродил ся єден з найвызначнійшых русиньскых писменників, новинарів і політичных діячів – Димитрий Вислоцкій (Ваньо Гунянка).