Кычера з Закопаного привезла Бронзову Паличку

Тілько што інформували сме про успіх Лемківского Ансамблю Пісні і Танця «Кычера» на тогорічным Фестівали Фольклору Польскых Ґуралів в Жывци, а тепер зас можеме заявити, што ліґницкій ансамбль был оціненый на тогорічным 51. Фестівали Фольклору Гірскых Земель в Закопаным.

Припомнийме, што участ в проходячым в днях 17.-24. серпня/авґуста 2019 р. фестівали в Закопаным была єдном з нагорід, яку Кычера отримала вчас фестівалю в Жывци.

Бронзова Паличка за весіля

Кычера, як і в Жывци, на 51. Фестівали Фольклору Гірскых Земель в Закопаным представляла своє постійне видовиско Лемківскє весіля. В хыжы молодиці перед шлюбом. За народный обряд ансамбль з Ліґниці отримал третє головне оцініня фестівалю – Бронзову Паличку. Нагорода была признана в другій катеґориі – ґруп презентуючых фольклор в артистчино опрацуваній формі.

Режысером видовиска єст ведучый Кычеры, Юрий Стариньскій. Проґрам был опрацуваный на основі материялів, походячых головно з тереновых досліджынь проведеных в околицях Ліґниці. Презентуване в ним весіля і облечыня выконавців характерны сут предовшыткым для обшыри західньой Лемковины, новосандецкого і ґорлицкого повітів. В Закопаным капеля ансамблю складала ся з традицйных смычковых інструментів. В рамках обряду Кычера представляла народны лемківскы танці – обертана, колечко, встеклу польку, чардаша та коломыйку.

В фільмі долов од першой годины можете позерати на фестівальовый концерт Кычеры.

Фіналовый концерт інчый як все

Бронзову Паличку члены Кычеры одобрали з рук бургомайстра Закопаного, Лешка Дорулі. «Хотіл єм подякувати тым, без котрых тот фестіваль бы ся не одбыл – ансамблям, якы до нас приходят, людям з Закопаного і з цілого світа, котры творят культуру і сут звязаны з нашым містом. Дякую чудовій публиці, яка до нас приізджат специяльно на тоту подію. При орґанізациі фестівалю робит вельо осіб, зато дякую ім вшыткым» – повіл ґазда Закопаного.

Тогорічный фіналовый концерт одбыл ся на фоні жалобы. В тых днях, в наслідстві сильных бурий, вчас входжыня на Ґєвонт штырі особы згынули од поражыня перуном, а близко 150 осіб было раненых. В звязку з тым, орґанізаторы 51. Фестівалю Фольклору Гірскых Земель рішыли, што фіналовый концерт пройде в задумі і тишы, што буде выразом солідарности з потерпілыма і іх родинами. Фінал был ограниченый до проголошыня результатів конкурсу і переданя оцінінь. Так само участникы фестівалю, в місце радістного концерту, выконали лем пару смутных, жалібных народных творів. Сцена была окрашена свічкками, а фінал зачал ся од короткой молитвы.

Гірскы ансамблі з цілого ґлобу

В 51. Фестівали Фольклору Гірскых Земель в Закопаным окрем ансамблів з Польщы участ брали ґрупы з Болгариі, Непалю, Македоніі, Сербіі, Словациі, Турциі, Украіны, Мадяр і Італиі. В каждій з катеґорий были признаны головны нагороды – Золота, Срібрна і Бронзова Паличкы. На тогорічным фестівали жырі першый раз передало Нагороду ім. проф. Романа Райнфуса і статую Желізного Когута вєдно з фінансовом нагородом для ансамблю Скальник з Камюнкы Великой за достовірне і автентичне представляня обрядів і звыків.

Фестіваль проходил під почестным патронатом Президента Польской Республикы Анджея Дуды і його жены Аґаты Корнгаузер-Дуды. Головным партнером подіі был Маршалківскій Уряд Малопольского Воєвідства. Фінансову підпору дало Міністерство Культуры і Нацийональной Спадковины. Закопяньскій фестіваль вызнаный є єдным з найважнійшых гірскых фестівалів во світі.