«Кычера» в Святій Земли – фотореляция

Лемківскій Ансамблль Пісні і Танця «Кычера» з Ліґници, в жолтни/октобри т.р., одбыл турне до Ізраіля та Палестины. Был то уж другій выізд ансамблю в реґіон Святой Землі в істориі його істнуваня. 

Протягом тыжньового турне колектив одвиділ найважнійшы місця в Ізраіли і Палестині. Концерты проходили в Гшалилеі (м.ін. в Назареті і Кані Галилейскій). «Кычера» брала участ в Медженародным Фольклорным Фестівали «Лоґос», якому патронувало Міністерство Культуры Ізраіля та Світова Фольклорна Орґанізация (анґ. The World Folklore Union). Концерты лемківской ґрупы, хоц проходили на териториі Ізраіля, то в реґіоні в більшости заселеным Палестинчыками. 

Турне молодых Лемків до Святой Землі было своєрідном выміном. Влони ґрупа з Палестины пребывала на запрошыня ансамблю на Медженародным Фольклорным Фестівали «Світ під Кычером», якого головным орґанізатором являт ся лемківскій ансамбль з Ліґниці. 

Дакус перше, бо в серпни/авґусті т.р., колектив одбыл своє турне до Іспаніі. З того выізду цінным про ЛАПіТ «Кычера» было навязаня контактів з меншыном Басків. Концерты проходили в Мурциі та Краю Басків. По тым выізді, на єдным з порталів явила ся в баскійскым языку статя про «Кычеру» і Лемків (до прочытаня за тым мотузком). 

Долов презентуєме фотореляцию з турне ансамблю до Ізраіля (Палестины). Материялы прислал ведучий ЛАПіТ «Кычера», Юрий Стариньскій.