«Кредо» в Польско-Словацкым Домі ім. Д. Юрковича в Ґорлицях

Два дни тому в Польско-Словацкым Домі ім. Д. Юрковича в Ґорлицях проходил вернісаж выставы трьох артистів під назвом Кредо.

На выставу складают ся роботы артисты з Пряшова – Яна Крлічкы і двох іконописців зо Львова: Остапа Лозіньского і Романа Зілінка. Спільным для вшыткых артистів є тема презентуваных прац – сакрум.

Характеристычным для творів Яна Крлічкы сут біблийны мотывы, ожывлены дрібницями штоденного жытя, споминами з дітинства і народном традицийом. Творит далеко од голосного міста, серед натуры, зато природа єст не лем фоном, але і рівнорядном частю діла. Творит поліхромуваны пласкорізбы, статуі святых ци сцены розпята.

Остап Лозіньскій, працівник Державного Музею ім. А. Шептыцкого во Львові (кєрівник до справ експозициі), творит іконы на шклі – полны духовости і емоций, попертых особистым досвідчыньом і свойом інтерпретацийом християньскых приповісти. Своі творы презентувална выставах в Украіні, Польщы, Канаді, Хорвациі, Німцях і в ЗША.

Третій артиста, Роман Зілінко, історик штукы з Державного Музею во Львові, занимат ся професийным іконописаньом з XVII i XVIII ст., особливо народном іконом Карпат ХІХ ст. В його творчости домінуют іконы, інспіруваны гуцульском та буковиньском традициями. В 2013 році был одзначений Нагородом Міністра Культуры Украіны.

Дває остатні артисты то часты участникы Медженародовых Варштатів Іконописців в Новици.

Выставу буде мож обзерати в Польско-Словацкым Домі ім. Д. Юрковича в Ґорлицях до 29. жолтня т.р.

фот. фб орґанізатора