Крайняк: Мусиме наштартовати русиньскы школы

Як пише інтернетовый сайт словацькой політічной партії Most-Híd, подля Петра Крайняка, жупного депутата Пряшівского самосправного краю за тоту партію і довгорічного русиньского актівісты, є тиск на народы без властной державы аж барз великый на то, жебы без орґанізованого жывота пережыли без пошкоджіня на своїй кількости і якости свого културно-сполоченьского жывота.

„Мусиме головно наштартовати спустнуте школство так, же вытвориме сіть основных школ з навчаньом русиньского языка і алтернатівным приступом ку освіті в русиньскім языку в окремых реґіонах, де жыють Русины,“ пояснює Крайняк на сайті політічной партії. В тій проблематіці бере за важне і забеспечіня якостного радіового і телевізного высыланя. Тото зо закона на Словакії забеспечує верейноправна інштітуція Розглас і телевізія Словеньска.

Подля Крайняка є потрібне і кооперовати діяльность старостів і пріматорів выникнутьом інштітуції, котра бы зъєдинила містны самосправы і в співпраці з єрархійов Ґрекокатолицькой і Православной церьквей досягнути оптімалный модел хоснованя русиньского языка в церьковнім жывоті.

Партія Most-Híd на своїм сайті підкреслює, же позіції русиньской народностной меншыны, в тім чіслі і пропозіціям на зліпшіня той позіції, занимать ся у своїм стратеґічнім документі під назвов Обчаньска візія 2016.

Жрідло: most-hid.sk

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА