Крайняк: Ключом ку будучности суть школы

Як днесь інформовав інтернетовый сайт політічной партії Most-Híd, подля єй фаховця і депутата партії за Пряшівскый край Петра Крайняка, ключом ку будучности і всокочіню русиньской меншыны на Словакії суть русиньскы народностны школы.

Єствуюча школьска сістема не знать достаточно забеспечіти ефектівне фунґованя основных і середніх школ, котрых абсолвенты походжають із оточіня менше кількостных народностных меншын. Притім бы мали мати забеспечене навчаня в материньскім языку почас цілой добы повииной школьской навщівности, пише далше сайт most-hid.sk.

„Приступ ку освіті в материньскім языку є основным правом каждого жытеля Словацькой републікы і є задачов резорта школства вытворити условії про наповньованя того права в окремых реґіонах Словакії. Барз голосно і ясно о тім проблемі бісідують представителі мадярьской, ромской і русиньской народностных меншын, але і представителі Чехів і Поляків жыючіх на Словакії,“ говорить Крайняк.

„Потрібна є зміна Державных освітніх проґрамів, котры бы понукали алтернатівне освоїня языковых і културных компетенцій свойой народностной общіны в рамках школьской сістемы Словацькой републікы на школах з навчалным языком словацькым. Про дакотры области є потрібне дати до понукы выбраных школ і бесплатны языковы курзы, котры бы додали доповніня языковых компетенцій про діти, котры навщівують школы з навчалным языком словацькым, але їх законны застопцьове собі желають освіту в русиньскім языку, котрым дома звычайно комунікують,“ додавать Петро Крайняк, депутат Прашівского самосправного краю, котрый є членом русиньской народностной меншыны на Словакії.

Жрідло: most-hid.sk

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА