Kрампняньска історична парада уж 15. раз

Римокатолицка Парафія в Дошници, Стайня Румак в Котани, Товариство Любителів Крампной і Околиці та жытелі сел Святкова Велика і Святкова Мала просят на XV Крампняньску Історичну Параду, котра одбуде ся в неділю 10. липця/юлия т.р. на пляци попри церкви св. Михала Архангела в Святковій Великій. Вчас подіі буде мож пізріти на показы історичных боів ци рукодільний ярмак.

Подібні як по інчых роках, і тот рік парада проходит з застараньом о храм св. Михала, котрий фурт потрібує ремонтів – влони были збераны грошы на поліпшыня стану церкви, но дальше вымагант она необіхдных прац, котры дозволят привернути єй красу з часів, коли служыла іщы Русинам. Церков св. Михала Архангела в Святковій Великій побудувана была в 1757 році (така дата вырізана над входом), по части фундацийом Петра Пашкєвича, товдышнього властителя села. Церков є орієнтувана, деревяна, тридільна, з вежом закінченом ізбицьом. Над олтарьом і храмом вірных дах шатровой конструкциі, закінчений банями. Середину прикрашат богата поліхромія, покрываюча вшыткы стіны, бані і повалу притвора. Неє в ній іконостасу, а деякій час тому, остала одмалювана ззовни на синьо-зелено-кольорову шату, што спочатку могло кус чудувати, але такій был перший вид святківского храму, а Лемкы часто в такій спосіб прикрашали своі церкви.

Сусідні села Святкова Велика і Святкова Мала як вшыткы на Лемковині до 1947 рока были заселены Лемками. Што тыкат тых двох сел, то більшіст жытелів пішла в 1947 році до Росиі. Зо Святківкы (як часто бесідувано на Святкову Малу) аж 250 осіб выіхало до УССР, а 7 родин, котры остали в 1947 році, выгнано в рамках Акциі Вісла. Зо Святковы Великой в 1945 році пішлo 838 осіб, а невелику част подібні як сусідні села в 1947 році депортувано на тзв. землі одзысканы. В Святківці находит ся друга церков, тіж св. Михала, молодша о 5 років од той зо Святковы Великой, бо з 1762. Подібні як церков речена горі є то так само тридільний храм, за послідні рокы, тіж порядні выремонтуваний. Днес то дочырній храм римокатолицкой парохіі в Дошници. Речены села находят ся в підкарпатскым воєвідстві, в ясільскым повіті, в ґміні Крампна.