Коросняньскій «Лемківскій вечер»

Ансамбль А Де То Давнійше Строіло не резиґнує з «Лемківского вечера». Мож сміло речы, што стріча вписала ся уж в шор постійных культурных імпрез міста Коросно. 29. червця/юнія ґрупа зорґанізує уж 6. едицию подіі. Тогорічний вечер має наголовок «Страх на Лемковині…».

Подія зачне ся о 13.00 год. лемківскыма варштатами про наймолодшых. По них пройдут варштаты лемківскых танців. Жебы брати участ в обох, треба ся скорше записати. Головна част вечера зачне ся о 19.00 год. в реставрациі Паркова. Отворит ю стіча з др. Тадеушом Лопаткєвичом, котрий розповіст про надприродны явиска, якы вписаны сут в народны леґенды і оповіданя Лемковины. Прелеґент навяже в тот спосіб до головной темы подіі – страху, котрий товаришыт того рода таємным розправам. Наконец запрезентуют ся ґаздове вечера – колектив А Де То Давнійше Строіло, якій в 2018 р. святкує 5. річницю основаня. Ансамбль, хоц свіжий в лемківскым музычным світі, вводит новы обробкы лемківскых співанок. Представляны сут як лемківскій фольк-рок.

«Лемківскы вечеры» тішат ся штораз більшым заінтересуваньом. Орґанізаторы од зачатку вказуют, што подія є направлена не лем на самых Лемків/Русинів, але предовшыткым на любителів Лемковины, гірскых вандрівок і музыкы. Перша едиция прошла як стріча осіб, котры радо ділят ся своіма скушеностями та одчутями повязаныма з Карпатами. Тым більше была радо принята і серед самых Лемків, што Коросно і околичны села то обшыр Коросняньской Руси.

Што рока подіі товаришыт якіса головна мысель. Влони орґанізаторы старали розправити ся з міфом, што Лемкы были в передвоєнным періоді бідны. Два рокы тому на подіі, яка мала наголовок «Стрічами на Бескіді», др Лопаткєвич розповіл про період XIV-XVIII ст. в Карпатах і етноґенезу рільничо-пастырского населіня в тій обшыри.

Вступне то 20 зл. Записы мож давати під но. 698 120 325 або пишучы на teatr_krosno@interia.pl.

фот. Орґанізаторы, пресовий материял