Коронавірус уж в Польщы!

По 8.00 год. в середу, 4. марця 2020 рока, зачала ся пресконференция шефа польского Міністерства Здоровля, Лукаша Шумовского, на котрій представлено актуальный статус борбы з пандемійом коронавіруса. Міністер заявил, што в Польщы єст уж перша особа заражена тым вірусом.

Вчас пресконференциі завідуючый ресортом од охороны здоровля оголосил, же першый в Польщы припадок явил ся в любушскым воєвідстві.

Коронавірус пришол з Німец

Як чули сме в выповіди Шумовского, хворый пациєнт приіхал з Німец, по чым, почувшы ослабліня, зголосил ся до дохторя, котрый по ініцияльных баданях рекомендувал дальшы поглублены баданя в САНЕПІДі (санітарно-епідемійолоґічны службы). Минулой ночы вказало ся, же результат баданя на приявніст коронавіруса в орґанізмі хворого был позитивный, што потвердило жданый, по правді, уж од давна першый припадок заражыня в Польщы. Не смотрячы на тото – як почули сме од міністра вчас конференциі – хворый чує ся добрі, лежыт в шпытали, а його близкы, з котрыма мал контакт, обняты сут кварантанном.

Службы здоровля апелюют о спокій

Потвердженый факт присутности коронавіруса в Польщы, хоц не мож го брати за сенсацию, бо – при його пандемічным виді і ґльобальным скорым розповсюджаню – перше-пізнійше і так бы пришол, може выкликати даякы непокоі. З той причыны службы охороны здоровля апелюют, жебы не впадати в паніку. Але барз важным єст быти осторожным і тримати гіґієну. Треба часто мыти рукы, ограничыти контакты предовшыткым з тыма особами, котры могли перебывати з людми, будучыма в посліднім часі в загороженых вірусом частях світа, або самы з такых приіхали. Треба тіж позерати на себе, не баґателізуючы жадных симптомів інфекциі – римы, кашляня, горячкы, а з такыма же признаками піти до дохторя.