Концерты Семінарийного Хору Теодора Ромжы в ЗША

В Мукачеві на Підкарпатскій Руси фунґує Семінарийний Хор блаженного Теодора Ромжы. Тот же хор неодолга выступит на америцкым континенті серед вірных грекокатолицкых парохій, котрых члены то Русины.

Перше з выступлінь пройде на запрошыня Карпаторусиньского Общества в ЗША, в грекокатолицкій парохіі св. Йоана Крестителя в місті Парма, штат Огайо. Концерт одбуде ся 19. вересня/септембра т.р. од 19.00 год. за локальным часом. О десят днів, 29. вересня/септембра т.р. семінаристы будут співати в грекокатолицкій парохіі св. Григория Нисского, поч. од 19.00 год. Офіра зобрана на першым з концертів, буде передана на підпору мукачівскых семінаристів.

Теодор Ромжа

Теодор Ромжа народил ся 11. квітня/апріля 1911 рока в Великым Бычкові. То русиньскій патріота, педаґоґ, священник, а пак єпископ русиньской мукачівской єпархіі на Підкарпатскій Руси. Ведіня єпархіі пришло Ромжы на тяжкій для Русинів і грекокатоликів час. НКВД примушало го до конверсиі на православя і піти під юрисдикцию московской Церкви, котра товды была сильно піддана влияням комуністичных власти. 27. жолтня/октобра 1947 рока ґрупа аґентів спецслужбы зорґанізувала автомобільну краксу на пути медже селами Іванівці і Лохово – так, жебы розбило ся авто, в котрым сідил владыка. Ромжа пережыл, але был перевезний до шпыталя в Мукачеві. Одышол до вічности 1. листопада/новембра 1947 р. по пілночы, скоро по тым, як му была задана отрова, яку му подала аґентка тайной службы, котра ся переоблекла за медсестру. 27. червця/юнія 2001 р. єпископ Теодор Ромжа был вызнаний за блаженного католицкой Церкви. Більше з біоґрафіі владыкы – чытайте за мотузком.