Концерт Владислава Сивого во Свиднику

Дня 1. серпня (авґуста) 2015 р. во Свиднику в ареалі „MINIGOLF VONKU“ о 20.30 год. (при великым амфітеатрі) одбуде ся концерт русиньского поеты і музыканта Владислава Сивого. Проґрам, названий „Із жывота справы“, а приготовлений на Лемківску Ватру в Михалові, ту буде мал свою предпремєру. Владислав Сивый, в музычным супроводі Томаша Сивого, представит Свидничанам, окрем старшых співанок выданых на ЦД „Смутный клавн, віршы і ґітары“, і вельо новых співанок з рыхтуваного альбому з ідентычном назвом, як наголовок концерту. Три пісні проґраму („Деліріюм тременс“, „Письмо братові“ і „Із жывота справы“) будут во Свиднику мати свою премєру. На концерті буде презентуваных разом 21 роковых співанок в інтерпретациі іх автора.

Владислав Сивый выступувал уж по пілнічній страні Карпат влони. Завершал VIII Бієнале Лемківской/Русиньской Культуры, котре проходило 10.-11. жолтня 2015 р. і – як поета і бард – был музычным участником XXII Лемківской Творчой Осени, котрой другій ден проходил 12. жолтня 2015 р. в Ґорлицях, даючы прекрасний концерт під голым небом на подвірци перед будинком Руской Бурсы. Послухайте деякых кавальчыків творчости того артисты:

На ювілейній ХХХV Лемківскій Ватрі на Чужыні в Михалові, котра одбуде ся в днях 7.-8. серпня (авґуста) тр., Владислав Сивый, враз з сыном Томашом, міцно выріжнит ся спосеред інчых выконавців, де будут домінувати фольклор (та його сучасны інтерпретациі) і міцны роковы ноты молодіжных ансамблів. Своім баладовым ритмом, поп-роковым звуком і предовшыткым, авторскым лірычным текстом і власном до них музыком, напевно зъєднат сой новых прихыльників і фанів. Лем.фм міцно рекомендує тот ватряний концерт, котрий за пляном одбуде ся в другій ден ватряной імпрезы (субота, 8. серпня) о 19.45 год.